Маңғыстау облысының әкімі Ералы Тоғжанов Онды ауылындағы сапарын кәсіпкерлердің қолдауымен салынғалы отырған жаңа мешіттен бастады. Ол жобасымен танысып, іргетасын құю рәсіміне қатысты. Мешіттің жалпы жер көлемі -256 шаршы метр, мұнарасының биіктігі 18 метр, күмбезі 12, ал қабырғасы 5 метр. Құлшылық үйінің құрылыс жұмыстары осы жылдың қыркүйек айында аяқталады деді, жобаға жауапты мамандар. Өңір басшысы аудан әкімі Тілек Көшмағанбетовке мешіттің инфрақұрылымын бақылауға алу жұмыстарын тапсырды.

Бұдан кейін, облыс әкімі Онды ауылының тұрғындарымен кездесті. Кездесу барысында ауыл әкімі Б.Балапан елді мекеннің әлеуметтік-экономикалық даму көрсеткіштері туралы баяндады.

- Округте бүгінде 242 отбасы тұрады. Тұрғындардың негізі қызмет түрі мал шаруашылығы. Ауылда барлығы 32 шаруа қожалығы жұмыс жасап тұр. «Атамекен» мемлекеттік бағдарламасы және «Ауыл шаруашылығын қаржылай қолдау» қоры арқылы бірнеше тұрғын несие алып, қазіргі таңда өз кәсіптерін дөңгелетіп отыр және 5 ауыл тұрғыны «Бизнес бастау» курсын оқуда, - деді ол.

2018 жылды қорытындылай келе ауыл басшысы бірқатар игі истердің атқарылғандығын, оның ішінде Басқұдық-Бекі ауыз суының екінші кезеңі аяқталып, Бекі елді мекеніне көше жарығы тартылғандығын атап өтті.

Маңғыстау ауданы әкімі Т.Көшмағанбетов тұрғындардың әл-ауқатын жақсарту мақсатында арнайы іс-қимыл жоспары жасақталып, аудан мен ауылдардағы қордаланып қалған өзекті мәселелерді уақытылы шешу үшін осы жоспарға сай бірқатар жұмыстар атқарылып жатқанын мәлімдеді.

Аудан орталығында 3 ауысымдық оқытудың алдын алып, өткен жылы жаңа 600 орындық мектеп пайдалануға берілген.

«Ауыл ел бесігі» бағдарламасы аясында осы жылы ауданда екі мектеп, мәдениет үйі мен ауыл клубы күрделі жөндеуден өтеді деп жоспарлануда.

Жақында бастау алған «Бизнес 3 күнде» жобасына қажетті материалдар алынып, ауданда дайындық жұмыстары басталып кеткендігін атап кетті.

Жиын соңында Ералы Лұқпанұлы аудан әкімі мен облыстың басқарма басшыларына Әбіш Кекілбаевтың 80 жылдық мерей тойына арнап жасақталған республикалық іс-шараның жоғары деңгейде өтуіне тиісті бірқатар жұмыстарды атқаруға тапсырды.