Түріктің "Галатасарай" командасының неміс шабуылшысы Лукас Подольски Чемпиондар лигасының жеребесінен кейін Twitter желісінде Қазақстан туралы жазба жазған еді, бұл туралы "Қамшы" порталы алдыңғы жаңалықтарында жазған болатын. Енді ол қазақстандық жанкүйерлерден кешірім сұрады. Бұл туралы "Қамшы" порталы Tengrinews.kz-ке сілтеме жасай отырып хабарлайды. 

"Борат туралы твитім үшін кешірім сұраймын, бұл тек әзіл болған еді. Қазақстан мен қазақстандықтарды мазақ еткім келмеген", - деді Подольски өз жазбасында қазақстандықтардан кешірім сұрап.

Еске сала кетейік, Подольски Чемпиондар лигасының топтық кезеңіндегі тартылған жеребенің қорытындысынан кейін  Twitter дегі парақшасына : "Ерекше күтемін" деп аты шулы кейіпкер "Бораттың" суретін қойып жазған болатын.

Фанаттар футболшының пікіріне наразылық танытты. Кейбірі УЕФА-ға шағым түсіруді ұсынса, кейбірі футболшыдан алаңда кек алу керектігін айтты. Сонымен қатар, жанкүйерлер Подольскидің Бораттың кейпіндегі суретін салу идеясын қолдап жатыр. Кейбір қолданушылар Подольскиге Астананың суретін жіберіп, Қазақстанның Бораттың фильміндегідей емес екенін дәлелдеуге тырысып жатыр.

Айта кетейік, түркиялық клубтың жанкүйерлері де Подольскидің әрекетіне жауап қатты: "Польди, мұндай кейіпкердің суретін жариялау саған тән нәрсе емес. Қарсыласқа құрмет көрсету керек",-дейді олар.