Мәртөк – өңірдің экономикалық және әлеуметтік дамуына елеулі үлес қосып келе жатқан аудан. Оның аудан болып құрылғанына да 80 жылдың жүзі болыпты. Жақында мәртөктіктер ауданның 80 жылдық мерейтойын сән-салтанатымен атап өтті.

Ауданның мерейтойына ар­налған салтанатты жиынға өл­кенің өсіп-өнуіне әр жылдары өзінің сүбелі үлесін қосқан мәр­төктік азаматтар мен азаматшалар, жергілікті тұрғындар қатысты. Мерейтойлық жиын аудан орталығындағы Ауған соғысына қатысқан жауынгерлерге қойылған ескерткішті салтанатты жағдайда ашумен басталды. Ауған соғысына 87 мәртөктік азамат қатысса, соның екеуі – Жақсығали Тә­жіғұлов пен Ана­толий Ру­дай сол соғыстан орал­мап­ты. Ескерткіштің салтанатты ашылу рәсімінде аудан әкімі Нұржауған Қалауов жи­налғандарға құттықтау сөзін арнап, сонау ел басына ауыр күн туған аласапыран кезде Ұлы Отан соғысына 3 мыңға тарта жерлесіміз аттанғанын, олар­­дың тең жартысына жуығы елге қайтып оралмағанын еске алды. Қазір ауданда сол бір сұм соғыстың бел ортасында болған екі-ақ ардагердің – Владимир Сычев пен Василий Лавренюктің қалғанынын атап өтті.

– Біз Ұлы Отан соғысында ерлік­пен қаза тапқан және Ауған соғысынан оралмаған жауын­герлеріміздің рухына тағзым етеміз, олардың есімдерін әр­дайым мақтан тұтамыз, – деп түйіндеді ойын аудан әкімі. Ме­рей­тойға арналған маңызды ша­раның негізгі бөлімі аудандық мәдениет үйінің кең залында болды. Зал қонақтарға лық толды. Салтанатқа шақырылғандардың көбі еңбек ардагерлері. Олардың арасында бір кездері еңбегімен ел байлығын еселеген еңбек адамдары – малшылар, механизаторлар, шаруашылық басшылары бар.

Салтанатты жиында баяндама жасаған аудан әкімі Нұржауған Қалауов аудан тарихына тоқ­талып, алғашқы ұжымшар, мәр­төк­тіктердің Ұлы Отан соғысына қатысуы жайын әңгіме өзегіне айналдырды. Мәртөктен бес Кеңес Одағының Батыры шыққанын тілге тиек ете келіп, Александр Ба­турин, Константин Губин, Ми­хаил Кожемякин, Евдоким Маз­ков және Федор Озмительдің есімдерін жерлестері жадында жаңғыртты. Сондай-ақ, Социа­лис­тік Еңбек Ерлері Николай Го­робец, Евдокия Ивощенко, Иван Пономаренко, Мария Чепи­гина және Григорий Шведтің аттарын да мақтаныш сезіммен атап өтті.

Ол биылдың өзінде ауыл шаруашылығы саласында 7,5 мың тонна ет, 39,2 мың тонна сүт өндіріліп, 5,4 миллион дана жұ­мыртқа, 20,8 мың тонна дән­ді және 1,7 мың тонна майлы да­қылдар жиналғанын мәлім етті. Өнер­кәсіп саласында да ауыз толтырып айтарлықтай жетістіктер бар екеніне айрықша тоқталды. Бүгінде ауданда жұмыс істейтін 11 кәсіпорынның дені ауыл ша­руашылығы өнімдерін қайта өңдеумен айналысады. Өңір басшысы мәртөктіктердің арасында Омарбек Бердиев, Александр Варюта, Рамазан Ділмағамбетов, Нағашыбай Ердәулетов, Татьяна Мякишева, Анатолий Калюжный, Анатолий Яблуновский, Раф­хат Мифтахутдинов, Үсен Жа­маншалов, Рауль Мир-Хайдаров, Аққағаз Досжановтардың есімі елге жақсы таныстығын, олардың ауданның дамуына сүбелі үлес қосқан жандар екенін алға тарта сөйледі.

Салтанатты сәтте Нұржауған Қалауов ауданның әлеуметтік жә­не мәдени дамуы жолында еселі еңбек еткен және тер төгіп жүрген бір топ мәртөктіктерді өзгелерге үлгі етті. Ғабиболла Ойнақұлов Ауданның құр­метті азаматы атанса, Қымбат Сүйінғалиева, Иван Классен, Шамиль Саринов, Василий Бондарев, Альфия Жү­сіпова, Виктор Гончарук, Мұрат Айназаров, Валерий Бобырь, Әкім­ала Қарабалин, Се­рік Жақ­сыбаевтар «Жыл адамы-2015» құрметіне лайық деп танылды.

Салтанатты марапаттау рә­сімінен кейін Қазақстан Рес­публикасы Парламенті Сенаты­ның депутаты Марат Тағымовтың жергілікті тұрғындарды аудан­ның мерейтойымен құт­тықтаған жеделхаты оқылды. Өз кезегінде жазушы Рауль Мир-Хайдаров осы өңірінде өткен балалық шағын еске түсіріп, туған то­пырағының жаны жайсаң адам­­дары жайлы әңгімеледі. Одан кейін мінбеге көтерілген ауданның бұрынғы әкімі Се­рік Ботағарин де жергілікті тұр­ғындарды, қонақтарды мерейтоймен құттықтап, жылы ле­бізін білдірді. Салтанатты ша­раның соңы жергілікті өнер ұжымдарының концерттік бағ­дарламаға ұласты.

Мерейтой құрметіне ұйым­дастырылған бәйгеге 16 сәйгүлік жіберілді. Жүйріктердің арасынан Родниковка ауылының шабандозы Жанарбек Ақшырақов мінген Малыш атты сәйгүлігі топ жарды. Тай жарыста Звездочка атты тайды тізгіндеген Ғасыр Қыстаубайұлы бас жүлдеге ие болды. Сол сияқты қыз қуу, ау­дарыспақ секілді ұлттық ойындар ұйымдастырылды. Әсіресе, көкпарды қызықтаушылар көп болды. Боз кілемде күш сынас­қандар арасында Дәурен Ермеков түйе балуан атанды. Бұл күні тоғыз­құмалақ, асық ату секілді ұлттық ойындардан да жарыстар өткізілді.

Дереккөз: "Егемен Қазақстан"