Aqtóbelik áıelder sheteldikterge de jatyryn jalǵa berip jatyr. Ózgege bala syılaǵany úshin áıelder 1,5-2,5 mln teńge alady. Bul týraly timeskz.kz saıtyna silteme jasap NUR.KZ portaly habarlaıdy.

Aqtóbede bes sýrrogat ana turady. Olardyń úsheýi nárestesin bosanyp, Almaty, Aqtóbe jáne Oral turǵyndaryna tabystaǵan. Al tórtinshi sýrrogat ananyń aıaǵy aýyr. Besinshisi bolsa, endi ǵana embıron saldyrýǵa bel býǵan.

Maýsym aıynda kelinshekke embrıondy Aqtóbeniń VRT-tehnologıasy klınıkasynda salatyn bolady. Nárestege tapsyrys berip otyrǵandar – Mártúk aýdanyndaǵy erli-zaıyptylar.

Taǵy bir tapsyrys berýshi - Kanadadaǵy Toronto qalasynyń týmalary. Sheteldik erli-zaıyptylar náresteni qushaǵyna basatyn sátti taǵatsyz kútip otyr. Júkti áıel tamyz aıynda bosanyp, náresteni sheteldik jupqa tabystaýy tıis.

Aıta keterligi, Kanadada sýrrogat anadan náresteli bolý áldeqaıda qymbat.

"Aqtóbelik sýrrogat analar óz qyzmeti úshin 1,5-2,5 mln teńge suraıdy. Taǵy shamamen 1,4 mln teńge ekstrakorporaldy uryqtandyrý jasatý úshin Aqtóbeniń VRT-tehnologıasy klınıkasyna tólenedi. Sýrrogat analarǵa memlekettik tapsyrys berý qyzmeti elimizde joq", - deıdi VRT-tehnologısy klınıkasynyń dırektory Lúdmıla Pokotılo.

Onyń aıtýynsha, tipti jatyry alynyp tastalǵan áıel de ana atana alady. Tek onyń ornyna áıeldiń jasýshalaryn ózine saldyrǵan sýrrogat ana balany kóteretin bolady.

"Kóbi qarajat qıyndyqtaryn sheshý úshin sýrrogat ana bolady. Jaqynda olardyń biri 2,5 mln teńge alyp, nesıesin japty", - deıdi Lúdmıla.

Úshinshi sýrrogat ana 2016 jyldyń aqpanynda tapsyrys berýshilerge egiz bosanǵan.