Elde oryn alǵan jaǵdaıǵa baılanysty «Nur Otan» partıasy Tóraǵasynyń Birinshi orynbasary M.Qul-Muhammed úndeý jasady, - dep habarlaıdy Qamshy.kz.
Úndeýde M. Qul-Muhammed Aqtóbe qalasynda oryn alǵan qantógiste qaza tapqandardyń týystaryna kóńil aıtyp, bul qandy oqıǵanyń bizdiń múbarak dinimizge qatysy joq aıýandyq ekenin aıtady. Barlyq qazaqstandyqtardy tatýlyq pen birlik arqyly ǵana barlyq qıyndyqtardy eńserýge bolatynyna sendiredi.
Qurmetti otandastar!
Qazaqstan musylmandary men búkil ıslam dúnıesi barsha aılardyń sultany – qasıetti Ramazan aıynda ótetin orazaǵa daıyndalyp jatqanda Aqtóbe qalasynda jantúrshigerlik lańkestik oqıǵa oryn aldy.
Sizder men bizdiń baýyrlarymyz – beıkúná jandar jazyqsyz qurban bolyp, oqqa ushty.
«Nur Otan» partıasy qaza tapqandardyń týystary men jaqyndaryna qatty qaıǵyryp, kóńil aıtady.
Biz ákesinen, baýyrynan jáne balasynan qapyda aıyrylǵan sizderdiń árqaısylaryńyzdyń qaıǵylaryńyzǵa ortaqpyz. Sizdermen birge biz de aza tutamyz.
Terrorısterde eshqashan ult ta, dinı senim de bolmaǵan. Qandyqol kisi óltirýshiler ózderiniń qasapty áreketterin jalǵan dinı urandarmen aqtap alǵysy keledi.
Mundaı adamgershilikten múlde ada is-áreketterdiń múbárak dinimizge úsh qaınasa sorpasy qosylmaıtynyn aıryqsha qaıtalap aıtqym keledi.
Naǵyz musylman úshin ıslam – árdaıym beıbitshiliktiń, meıirimdiliktiń, tózimdiliktiń jáne ózara qurmettiń dini bolyp qala beredi.
Biz týǵan Otanymyzdyń taǵdyryn oılaıtyn búkil halyqty birlik pen berekege shaqyramyz.
Barsha qazaqstandyqtar úshin eń qasıetti qundylyqtar sanalatyn táýelsizdik, saıası turaqtylyq pen qoǵamdyq kelisim Elbasymyz ustanǵan Qazaqstannyń nyǵaıýy, ósip-órkendeýi men gúldenýine baǵyttalǵan saıasatynyń berik irgetasy ekendigin árqashan umytpaýymyz kerek.
Búkil otandastarymyzdy aǵaıynnyń birligin, elimizdiń tynyshtyǵyn, halqymyzdyń tatýlyǵyn kózdiń qarashyǵyndaı saqtap, ony odan ári nyǵaıta berýge shaqyramyz.
Tek birge, tek tatýlyqta, tek ózara syılastyqta ǵana biz kez kelgen qıyndyq pen kedergini eńsere alamyz. Osyny árdaıym este ustaıyq, aǵaıyn!
