“I am a Singer” jobasynyń tórtinshi kezeńinde Dımash Qudaıbergenov gonkongtyq ánshi ári akter Djekı Chýnnyń tanymal ánin qytaı tilinde oryndady, dep habarlaıdy QazAqparat Qytaıdaǵy «Sınhýa» agenttigine silteme jasap.
El arasynda Djekı Chýndy «kishkentaı Djekı Chan» dep atap ketken.
«Tynbaı jattyqqanynyń arqasynda Dımash ándi qytaı tiliniń segizinshi deńgeıinde (HSK deńgeıin tekserýge arnalǵan biregeı emtıhan) oryndady», – dep jazady Qytaı basylymy.
Qytaılyq jýrnalıser Dımashtyń kezekti obrazynyń da óte tartymdy bolǵanyn atap ótken. Eýropalyq úlgidegi V-keskindi pıdjak pen oǵan úılesip turǵan jibek sharf. Al qara tústi bas kıim onyń reńin odan saıyn asha tústi.
Zalda otyrǵan kórermender qytaı jýrnalıserine Dımashtyń qytaı ánin oryndaýyna qatysty óz oılaryn aıtyp, joǵary baǵalaǵan. Olardyń aıtýynsha, Dımash úlken sahnada alǵash ret qytaı tilinde án salǵanyna qaramastan, taǵy da bir ret óziniń kásibıligin dáleldedi. Tyńdarmandar Dımash ándi qytaı tiliniń 8-shi deńgeıinde (joǵary deńgeı) oryndaǵan dep baǵa berdi.
Al Dımash ózin barynsha senimdi ustaǵanymen, sahnaǵa shyqpas buryn qatty qobaljyǵanyn jáne baryn salǵanyn aıtyp berdi. Dımash alǵashqy eki kezeńniń birinde dál osy qytaı ánin oryndaǵysy kelgen eken. Alaıda qazaq ánshisi tildiń aıtylýynda aǵattyq jiberip alamyn ba dep qoryqqanyndyqtan ony keıinge qaldyrǵan.
“Men án aıta bastaǵan kezde tyńdarmandar sózdiń maǵynasyn túsinbeı qala ma dep qoryqtym”, – deıdi Dımash Qytaı agenttigine bergen suhbatynda.
“Qysqy Ýnıversıada ashylýyna qatyssa da, Dımash ár sátti qalt jibermeı, qytaı tilin oqı berdi. Qytaı tili muǵalimimen sahnada da, sahnadan tys ta kóp daıyndaldy. Daıyndyq kezinde zalda otyrǵan kórermenderdiń pikirine de zer salyp otyrdy. Bir sózben aıtqanda, Dımash qatty tyrysty, janyn saldy”, – dep jazady “Sınhýa”.
Dımash ne sebepti Djekı Chýn Hok-Áýdyń «Kúzgi muń» atty ánin tańdaǵanyn bylaısha túsindirdi:
“Alǵash tyńdaǵan sátte-aq ol án maǵan qatty unap qaldy. Ánniń maǵynasy da jaqsy”.
Aıta keteıik, “I am a singer” jobasynyń tórtinshi kezeńiniń túsirilimi 2 aqpanda bolyp ótti. Efırden ol 11 aqpanda saǵat 20:30-da kórsetiledi. Shamamen osy ýaqytta Dımashtyń qytaı tilinde oryndaǵan ániniń vıdeosy paıda bolady.
Aıta ketein jaıt, atalǵan ándi osy jobada 2013 jyly qytaılyq ánshi Sha Baolán oryndaǵan.
Týyndy mahabbat pen aıyrylysý jaıynda.
“Únsiz ýádeńdi este saqtaǵynyńdy qalaımyn, men jalǵyzdyqtan qoryqpaımyn, tek sen jalǵyz qala ma dep úreılenemin”, – deıdi án mátini.
“Kúzgi muńnyń” avtory ári alǵashqy oryndaýshysy Djekı Chýn Hok-Áý (Jacky Cheung) qazir 55 jasta. Onyń án álemindegi ataq-abyroıy 1984 jylǵy án baıqaýynan keıin sharyqtady.
