Memleket jáne qoǵam qaıratkeri, Erlan Qarın «Qazaqstan» Respýblıkalyq Teleradıokorporasıasy» Aksıonerlik Qoǵamynyń Basqarma Tóraǵasy bolyp taǵaıyndaldy. Erlan Tynymbaıuly bul qyzmetke Qazaqstanda aqparattyq qaýipsizdikti kúsheıtýge, sońǵy jyldary qatty álsirep qalǵan memlekettik aqparattyq ıdeologıalyq baǵytty qalpyna keltirýge jáne strategıalyq mańyzy zor jumysty atqarý úshin Elbasynyń sheshimimen taǵaıyndaldy.
Erlan Tynymbaıuylynyń bundaı qyzmetke taǵaıyndalǵanyn Aqparat jáne Komýnıkasıalar mınıstri Dáýren Abaev habarlady.
«Búgin «Qazaqstan» RTRK» AQ ujymyna jańa basshy – Erlan Qarındi tanystyrdym.
Erlan Tynymbaıuly bilikti saıasattanýshy, ıdeolog, elimizdiń shynaıy patrıoty retinde kópshilikke jaqsy tanys ekenine esh kúmánim joq.
Endigi jerde oǵan elimizdegi eń iri medıa qurylymnyń jumysyn odan ári damytý tapsyrylyp otyr.
Erlan Tynymbaıuly buǵan deıingi irgeli sharalardy odan ári jalǵastyryp, korporasıany jańa deńgeıge kóteredi dep senemin», - dep jazdy mınıstr áleýmettik jelidegi esebinde.
Bul Teleradıokorporasıa jáne onyń quramyna kiretin aqparattyq agenttikter memlekettik saıasatty quraıdy ári memlekettik saıasatty nasıhattaıdy. «Qazaqstan» Respýblıkalyq Teleradıokorporasıa quramyna «Qazaqstan» Ulttyq telearnasy, «KAZsport» telearnasy, «Balapan» telearnasy, «Mádenıet» telearnasy, Qazaq radıosy, «Shalqar» radıosy, «Astana» radıosyn jáne de aımaqtyq teleradıokompanıalar kiredi. Ol Qazaqstandaǵy jáne aımaqtaǵy eń iri Teleradıokorporasıa bolyp tabylady.
Erlan Tynymbaıuly Qarın – memleket jáne qoǵam qaıratkeri, saıasattanýshy ǵalym. 2014 jyldyń 16 qazan kúninen bastap QR Prezıdenti janyndaǵy Strategıalyq zertteýler ınstıtýtynyń dırektory qyzmetin atqarǵan. Aıta keter bolsaq, Erlan Tynymbaıuly basshylyqqa kelgennen keıin, QSZI – álemniń 6 myńnan astam saraptamalyq ınstıtýttary men ortalyqtarynyń ishinde úzdik 150-ge kirdi.
Osyǵan deıin, bul teleradıokorparasıany menedjerler men kadrlyq jýrnalıster basqarǵan bolatyn. Teleradıokorporasıa basshylyǵyna tuńǵysh ret saıası qaıratker taǵaıyndalyp jatyr.
