QR Bas Prokýrory Jaqyp Asanov, QR İİM Qalmuhanbet Qasymovtyń nazaryna
Birneshe kún buryn mynadaı sumdyqty estip jaǵamyzdy ustadyq.
Ǵalamtorǵa belgisiz bireýler «Qazaq qyz-kelinshekteri qalaı kishi dáretke otyrady» degen taqyryppen vıdeo jarıalaǵan. Eń soraqysy sol – vıdeoǵa tek ulty qazaq áıelderdi túsirgen. Onda 10 shaqty qara kóz qyzdar men áıelderdiń dárethanaǵa otyrǵanyn ashyq kórinedi.
Vıdeony qaı eldi-mekende túsirgeni belgisiz, alaıda kún jyly kezde túsirilgeni belgili. Qara kóz qyzdarymyzdy masqaralap túsirgen atalmysh vıdeo ǵalamtorda keńinen taralyp, kórýshilerdiń sany myńnan asady.
Mundaı soraqylyq iske barǵan azamattardyń kim ekenin anyqtaý múmkin bolmaı otyr. Olar vıdeony jasaý úshin ábden daıyndalyp, biraz jumys atqarǵany kórinip tur. Eń aldymen, olar dárethananyń astyna jáne kireberisine kamera ornatqan. Dárethanaǵa kirgen qyz kelinshekterdiń bet-júzin anyq túsirip, odan keıin dárethananyń astynan túsirgen kamera arqyly qyzdardyń dárethanaǵa otyrǵanyn kórsetken. Vıdeoǵa túsip qalǵandardyń ishinde aq shashty qarıa áje de, orta jastaǵy áıel de, jas qyz da bar. Vıdeonyń ataýyna saı jáne ondaǵy áıelderdiń bet-álpetine qarap qazaqtardy ǵana túsirgen dep topshylaımyz. Osydan vıdeony jasaýshylardyń aldyn-ala barlyǵyn oılastyryp, belgili bir maqsat kózdegenin ańǵarýǵa bolady.
Bul soraqylyqtyń aldyn almasa, áli talaı qarakóz qyz-kelinshekter adamnyń jeke basyn qorlaıtyn atalmysh vıdeo avtorlarynyń qurbanyna aınalýy múmkin. Olardyń qatarynan kez kelgenimizdiń anamyz, ápke-sińlilerimiz nemese qaryndas baýyrlarymyz kórinip qalmasyna da kim kepil?! Eń qorqynyshtysy – mundaı bylyq is-áreketter álemge taralyp, ulttyq namysymyzǵa tıip, qazaq halqyn aıaq asty etkisi keletinderdiń sany artýy ábden múmkin. Sol sebepti de bul máselege beıjaı qaramaı, qylmyskerlerdi quryqtap, basyn ashyp alý qajet dep oılaımyz.
Atalmysh vıdeo adamnyń jeke basyn qorlaıtyn, mazaq etý maqsatynda túsirilgeni málim. Ol – tek bir adamǵa ǵana emes, búkil ultymyzǵa tıgizer kesiri mol materıal. Sondyqtan "Qamshy.kz" portaly QR konstıtýsıalyq zańy boıynsha, bul isti atqarýshylardy taýyp, jeke basty qorlaý babymen zańmen qýdalaýdy suraıdy. Sonymen qatar «Qazaq áıelderi qalaı kishi dáretke otyrady» degen taqyryppen ǵalamtorda taraǵan vıdeony óshirip tastaýlaryńyzdy talap etedi.
El aldynda etegin ashpaǵan, ar-ádepti saqtaǵan qarakóz qyz-kelinshekterimizdi bulaı qorlaýyna jol bermeı, jedel túrde máseleniń mán-jaıyn anyqtap, bul isti jedel túrde júgendeý qajet dep esepteımiz.
"Qamshy.kz" portaly bul hattyń elektrondy nusqasyn QR İİM men QR Bas Prokýratýrasynyń elektrondy poshtasyna jiberedi.
Qamshyger: Nazerke Labıhan
