Almatyda ótken 28-shi dúnıejúzilik qysqy Ýnıversıada oıyndary óz máresine jetti. Qazaqstan quramasy elimizde ótken Ýnıersıada oıyndarynda barlyǵy 36 medal ıemdendi. Onyń 11-i altyn, 8-i kúmis, 17-i qola medal. Júldegerlerge qanshalyqty qarajat jumsalǵany týraly sportportal.kz jazdy.

Ýnıversıada oıyndary bastalmaı turyp Sport jáne mádenıet mınıstiri Arystanbek Muhmedıuly Ýnıversıada jeńimpazdary 4,9 mıllıon teńge, kúmis júldegerleri 3,3 mıllıon teńge, qola júldegerleri 1,6 mıllıon teńge kólemindegi syıaqy alatyndyqtaryn málimdegen bolatyn. Júldegerlerdiń bapkerleri de dál sondaı sommadaǵy syıaqyǵa ıe bolady.

Shaıbaly hokeıden elimizdiń erler quramasy fınaldyq kezdesýde Reseı quramasyna jol bergen bolatyn. Osyndaı nátıjelerine qaramastan quramamyzdyń 23 oıynshysynyń árqaısysy 3,3 mıllıon teńgeden alady.

Birinshi oryn ıelengen sportshylarǵa beriletin jalpy aqsha 63 mıllıon 700 myń teńge bolsa, kúmis júldegerlerge 125 mıllıon 400 myń teńge, qola medal alǵan sportshylarǵa jalpy 40 mıllıon teńge beriledi. Sportshylardyń bapkerlerine de júzdegen mıllıondar jumsalmaq. Jalpy Ýnıversıada júldegerleri men olardyń bapkerlerine 458 mıllıon 200 myń teńge tólenedi.

28-shi dúnıejúzilik Ýnıersıada oıyndaryna qatysqan basqa elder sportshylarynyń aıtýynsha olarǵa júldeli oryndary úshin eshqandaı syıaqy qarastyrylmaǵan.

Eń basty aıta ketetinimiz 458 mıllıon teńge respýblıkalyq búdjetten bólinetin bolady.