Aqpannyń 11-nen 12-ine qaraǵan túni 57 jasqa qaraǵan shaǵynda Respýblıkalyq búdjettiń atqarylýyn baqylaý jónindegi Esep komıtetiniń basshysy Qozykórpesh Jańbyrshın ómirden ozdy. Bul týraly atalǵan vedomstvonyń baspasóz qyzmeti habarlaıdy.

Berilgen málimetke sáıkes, Qozykórpesh Esimuly júrek syrqatynan qaıtys bolǵan. Artynda áıeli, úsh balasy qaldy.

Qozykórpesh Esimuly Jańbyrshın 1960 jyly 2 shildede Aqtóbe oblysy Baıǵanın aýdanynyń Jarqamys aýylynda týǵan.

1982 jyly Máskeý ekonomıka-statıstıka ınstıtýtyn (MESI) «ekonomıs-matematık» mamandyǵy boıynsha bitirgen.

1987-1990 jyldar aralyǵynda - MESI aspıranty. Ekonomıka ǵylymdarynyń doktory, dısertasıasynyń taqyryby: «Geterogendi áleýmettik-ekonomıkalyq júıeler: strategıalyq basqarý teorıasy men ádistemesi» (2003).

1982-1983 jyldary QazKSR Memlekettik josparlaý janyndaǵy Josparlaý jáne basqarý prosesterin avtomattandyrý ǵylymı-zertteý ınstıtýtynyń ınjeneri bolyp jumys istegen.

1983-1987 jyldar aralyǵynda - QazKSR Memlekettik josparlaý mekemesiniń ekonomısi jáne aǵa ekonomısi.

1991-1992 jyldary - Qazaqstan Respýblıkasy Memlekettik ekonomıka jónindegi komıtettiń bas mamany bolyp jumys istegen.

1992-1993 jyldar aralyǵynda - Qazaqstan Respýblıkasy Prezıdentiniń janyndaǵy Joǵary ekonomıkalyq keńestiń konsýltanty.

1993-1994 jyldary - Qazaqstan Respýblıkasy Prezıdentiniń janyndaǵy Ekonomıkalyq konsýltanttar keńesi basshysynyń orynbasary laýazymyn atqarǵan.

1994-1995 jyldary - Qazaqstandaǵy Eýropa qaýymdastyqtary komısıasy búrosynyń ulttyq dırektory.

1995-1997 jyldar aralyǵynda - Almaty qalasy Ekonomıka jónindegi komıtettiń tóraǵasy. 1997-2003 jyldar aralyǵynda - Almaty qalasy ákiminiń orynbasary.

2003-2007 jyldar aralyǵynda - Qazaqstan Respýblıkasy Qorǵanys mınıstriniń ekonomıka jáne qarjy jónindegi orynbasary bolyp qyzmet atqarǵan.

2007 jylǵy aqpannan bastap - Qazaqstan Respýblıkasy Qaýipsizdik Keńesi Hatshysynyń orynbasary.

2009 jylǵy qyrkúıekten bastap - Qazaqstan Respýblıkasy Qaýipsizdik Keńesi Hatshysynyń orynbasary - Qazaqstan Respýblıkasy Qaýipsizdik Keńesi Hatshylyǵynyń meńgerýshisi.

Memleket basshysynyń 2014 jylǵy 15 qańtardaǵy Jarlyǵymen Respýblıkalyq búdjettiń atqarylýyn baqylaý jónindegi esep komıtetiniń Tóraǵasy bolyp taǵaıyndalǵan.

«Qurmet» ordenimen (2005), III dárejeli «Barys» ordenimen (2012), 10 mereıtoılyq jáne vedimistik medalmen, sonyń ishinde Reseı Federasıasynyń jáne Belarýs Respýblıkasynyń medaldarymen marapattalǵan.