Jaqynda Qazaly qalasynda turatyn Azamat Nurmahanovtyń shańyraǵynda tosyn oqıǵa oryn aldy. Olaı deıtin sebebimiz, bir búıirinde «Alla», bir búıirinde «Muhammed» degen jazýy bar qozy týyldy, dep habarlaıdy qazaly.kz

– Keshqurym mal óristen qaıtqan soń qoraǵa kirsem, býaz analyq qoı tolǵatyp júr eken. Bul qalypty jaǵdaı bolǵan soń, esh alańdamastan úıge kirip kettim. Tańǵa jýyq qoraǵa kelsem, mal tóldep, qozy týypty, – deıdi Azamat Ediluly.

Jańa týǵan qozynyń denesindegi aq belgini baıqaǵan ol tańǵajaıyp jazýdy birden Qazaly qalasyndaǵy «Jıenaly Ahýn» meshitiniń ımamy Bolatbek Naýryzbekovke kórsetken. Imam qozynyń ústindegi «Alla jáne Muhammed» degen jazýlardy oqypty.

Ú.Túktibaev aýylyndaǵy «Orynbet ıshan» meshitiniń bas ımamy Ǵabdýlla İzat: «Bul jaǵdaı Alla taǵalanyń bir, paıǵambarymyz Muhammedtiń (s.ǵ.s) haq, Quran kárimniń shyn ekenin aıǵaqtaıdy. Bir búıirinde «Alla», ekinshi búıirinde «Muhammed» degen jazýy bar qozynyń Qyzylorda oblysynda alǵash ret qasıetti Qazaly jerinde týýy kezdeısoqtyq emes. Bul topyraq kıeli jer. Ýaqytysynda bul jerde júz meshit bolǵan», – dep bul tańǵajaıyp oqıǵany jaqsylyqqa jorydy.

«Jaqsyny kórmekke» degen. Bul tańǵajaıyp kórýge kelgen adamnyń qarasy kóp boldy. Olardyń arasynda Jasaral Seralıev bastaǵan namazhan jigitter, kórshi-kólem men aǵaıyn-týystar bar. Jasy seksenniń tórteýine kelgen Ómirzaq Ospanov aqsaqal bul jaqsylyqtyń nyshany ekenin aıtyp, aq batasyn berdi. Bıyl paıǵambar jasyna kelgen Sarqyt apaı jınalǵandarǵa áýlettiń atynan alǵysyn aıtyp, Ómirzaq aqsaqaldyń ıyǵyna shapan japty.