Búgin Qazaqstan halqy Astanada Esep komıtetiniń tóraǵasy Qozykórpesh Jańbyrshındi aqtyq saparǵa shyǵaryp salyp jatyr.
Azamattyq janaza seısenbi kúni tańerteń M. Gorkıı atyndaǵy orys drama teatrynda ótti. Janazaǵa memlekettik jáne qoǵamdyq qaıratkerler, parlament depýtattary qatysty. Jańbyrshın Ulttyq panteonǵa jerlenedi.
"Qozeke eldiń bolashaǵy úshin aıanbaı eńbek etip, óz úlesin qosty, sońynan óshpes iz qaldyrdy. Memleket te muny baǵalady. Biz memleket basshysy men úkimet músheleriniń atynan kóńil aıtamyz", — dedi QR aýyl sharýashylyǵy mınıstri, premer-mınıstrdiń orynbasary Asqar Myrzahmetov.
Respýblıkalyq búdjettiń oryndalýyn baqylaý boıynsha Esep komıtetiniń tóraǵasy Qozykórpesh Jańbyrshın aqpannyń 11-nen 12-ne qaraǵan túni qaıtys bolǵan edi. Júrek aýrýynan baqılyq bolǵan Qozykórpesh Jańbyrshın 1960 jyly 2 shildede Aqtóbe oblysy Baıǵanın aýdany Jarqamys aýylynda dúnıege kelgen.
Ol memleket basshysynyń 2014 jylǵy 15 qańtardaǵy Jarlyǵymen Respýblıkalyq búdjettiń atqarylýyn baqylaý jónindegi esep komıtetiniń Tóraǵasy bolyp taǵaıyndalǵan.
