Ulttyq búro Áblázovqa qatysty sotqa deıingi tergeý jumystaryn jalǵastyryp jatyr, - dep habarlaıdy Tengrinews.kz tilshisi vedomstvonyń baspasóz qyzmetine silteme jasap.
"Cybaılas jemqorlyqqa qarsy is-qımyl ulttyq búrosy "BTA Bank" AQ Dırektorlar keńesiniń burynǵy tóraǵasy Muhtar Áblázovtiń 7 mıllıard dollardan asa qarajatty jymqyrý deregi boıynsha sotqa deıingi tergeý jumystaryn jalǵastyryp jatyr. Tergeý málimetinshe, Áblázov jymqyrǵan aqshalarmen aksıalardy satyp alyp, banktiń kapıtalyn ósirgen. Osylaısha, sheteldik ınvestorlar men Qazaqstan azamattary banktiń turaqtylyǵyna senip, sonda qarajattaryn salyp kelgen. 2005-2008 jyldar arasynda salynǵan depozıtter men ınvestısıalardy barynsha arttyrý nátıjesinde bank kapıtaly 8 esege ósken. Sodan Muhtar Áblázov birneshe kompanıasyn nesıeleý arqyly adamdardy aldap, aqshalardy jymqyrǵan", - delingen vedomstvonyń habarlamasynda.
QR Ulttyq búro ókilderi Áblázovqa 2017 jyldyń 15 aqpanyna deıin vedomstvonyń ákimshilik ǵımaratyna kelý qajettigin aıtyp ótti.
"Qazirgi ýaqytta tergeýdiń asa aýyr qylmys jasaý deregi boıynsha jınaǵan dálelderi arqyly kúdikti Áblázovtiń áreketin QR Qylmystyq kodeksiniń 263-babynyń 4-bóliginen ("Qylmystyq qoǵamdastyq qurý jáne oǵan basshylyq etý, sol sıaqty oǵan qatysý") QR Qylmystyq kodeksiniń 176-babynyń 3-bóliginiń "a", "b" tarmaqtaryna ("Memlekettik qupıalardy quraıtyn málimetterdi shet memleketke, halyqaralyq nemese sheteldik uıymǵa ne olardyń ókilderine berý"), QR Qylmystyq kodeksiniń 24-babynyń 3-bóligin QR Qylmystyq kodeksiniń 176-babynyń 3-bóliginiń "a", "b" tarmaqtaryna, QR Qylmystyq kodeksiniń 193-babynyń 3-bóliginiń "b", "v" tarmaqtaryna ("Erekshe qundylyǵy bar zattardy jymqyrý" - aldyn ala sóz baılasý arqyly adamdar toby jasaǵan;), QR Qylmystyq kodeksiniń 220-babynyń 1-bóligi ("Oblıgasıalardy ornalastyrýdan alynǵan aqshany maqsatsyz paıdalaný") jáne QR Qylmystyq kodeksiniń 228-babyna ("Baǵaly qaǵazdarmen operasıalar júrgizý qaǵıdalaryn buzý") baptaryna aýystyrý múmkin boldy. QR Qylmystyq-prosessýaldyq kodeksiniń 206-babynyń 1-bóligine sáıkes, kúdiktiniń is-áreketin saralaý týraly qaýly, eger qorǵaýshynyń qatysýy zań boıynsha mindetti bolsa nemese bul týraly kúdikti ótinishhat berse, qorǵaýshynyń qatysýymen jáne qaýly shyǵarylǵan kezden bastap jıyrma tórt saǵattan keshiktirilmeı jarıa etiledi. Kúdikti nemese onyń qorǵaýshysy kelmeı qalǵan jaǵdaıda, qaýly jıyrma tórt saǵat ótkennen keıin de jarıalanýy múmkin. Muhtar Áblázovtiń Qazaqstan Respýblıkasynan tys jerde bolýyna jáne Ulttyq búroǵa kelýden bas tartýyna baılanysty QR Qylmystyq-prosessýaldyq kodeksiniń 206-babynyń 8-bóligine sáıkes, kúdikti Qazaqstan Respýblıkasynan tys jerde bolǵan jáne qylmystyq qýdalaý organdaryna kelýden jaltarǵan jaǵdaıda - sotqa deıingi tergep-tekserýdi júzege asyratyn adam, al qorǵaýshy kelgen jaǵdaıda - qorǵaýshy da, kúdiktiniń is-áreketin saralaý týraly qaýlyda onyń Qazaqstan Respýblıkasynyń sheginen tys jerde bolýyna jáne sotqa deıingi tergep-tekserý organdaryna kelýden jaltarýyna baılanysty kúdikti dep jarıalaý múmkin emestigin kýálandyrady. Osyǵan baılanysty Áblázov 2017 jyldyń 15 aqpanynan deıin myna mekenjaı boıynsha ornalasqan Ulttyq búronyń ákimshilik ǵımaratyna kelýi tıis: Qazaqstan Respýblıkasy, Astana qalasy, Seıfýllın kóshesi, 37", - delingen Ulttyq búronyń habarlamasynda.
Eske sala keteıik, 2017 jyldyń 2 aqpanynda QR Sybaılas jemqorlyqqa qarsy is-qımyl ulttyq búrosy jaýap alý úshin Muhtar Áblázovti Astanaǵa shaqyrǵan bolatyn. "QR Sybaılas jemqorlyqqa qarsy is-qımyl ulttyq búrosy "BTA Bank" AQ burynǵy top-menedjmenti M.Q.Áblázovqa, J.D.Jarymbetovke jáne ózgelerge qatysty qylmystyq istiń sotaldy tergeýin jalǵastyryp jatyr. Tergeý barysynda Antıkorrýpsıa qyzmeti Áblázov pen onyń sybaılastarynyń zańsyz áreketteriniń qosymsha dálelderin tapty. Bankten qarajatty jymqyrýdyń jańa nusqalary ashyldy. Anyqtalǵan derekter Áblázovtiń qylmystyq uıym quryp, oǵan basshylyq etken degen qosymsha kúdik kelip otyr. Onyń ishinde birqatar uıymdasqan qylmystyq top kiredi, top Qazaqstan terıtorıasynda da, shetelde de áreket etken", - delingen edi vedomstvo habarlamasynda.
