Almatyda qoǵamdyq kólikterdegi qolma-qol tólenetin jol aqysy 150 teńgege ósedi, dep jazady Qamshy.kz aqparat agenttigi.
Elektrondy «Ońaı» kartasymen tólenetin jol aqysynyń quny 80 teńge bolyp qalady. Mundaı saralanǵan tarıf týrasynda sheshim 29 maýsym kúni Almaty máslıhaty depýtattarynyń ortaq kelisimimen shyqty. Atalmysh ádis arqyly ákimdik almatylyqtardyń «Ońaı» kartasyn túgeldeı paıdalanýyn qamatamasyz etpek.
«Jubatý» bonýsy retinde eki qoǵamdyq kólikpen qatynaıtyn almatylyqtar 1 saǵat kóleminde «Ońaı» kartasynyń bir ǵana tólemimen, ıaǵnı 80 teńgemen júrý múmkindigine ıe bolady.
Jaýaptylar kóleńkeli bıznespen osylaısha kúrekspek.
«Bizdiń oıymyzsha 1 tamyzdan bastap dıff tarıf engiziledi. Metronyń baǵasy 80 teńge bolady, ol kóterilmeıdi. Óıtkeni, metro avtokólik zańyna kelmeıdi. Qoǵamdyq keńesten keıin biz ákimniń qaýlysyn ıýstısıaǵa engizemiz. Iýstısıa tirkegen soń 10 kúnnen keıin ol kúshine enedi», - deıdi Jolaýshylar kóligi jáne avtomobıl joldary basqarmasy basshysynyń orynbasary, Bekzat Bekishev.
Respýblıkada qoǵamdyq kólikter asyqpaı, ári tez arada óz pozısıasyn kúsheıtýde. Máselen, osydan 1 jyl buryn qoǵamdyq kólikter 81,7% jolaýshyny tasysa, osy jyly 82,4%-ǵa artqan. Troleıbýspen qatynaıtyn jolaýshylardyń sany 13,2%-ǵa artty. Esesine, taksoparkterdiń jaǵdaıy múshkil, olardyń tabysy 36%-ǵa tómendegen kórinedi.
«Dıff tarıf degenimiz 150 teńge, ol jaı bir kez-kelgen san. Ol 200 bolýy múmkin edi jaı yntalandyrý úshin. Al, jalpy bizdiń esebimiz 149 jarymnyń ishine kiretini - onyń ishindegi janarmaıy bar, 30 paıyzy jalaqy, kólik jańartýy. Úkimetpen bekitilgen metodıkasy bar óziniń, sol boıynsha daıyndalǵan esep. Ákimshiliktiń usynysy boıynsha, túsken 150 teńgeden júrgýzishini yntalandyrý úshin 50 teńgesi júrgizýshige beriledi. Sonymen, onyń jalaqysy kóteriletin bolady», - deıdi «Almaty qalalyq jolaýshylardy tasymaldaý kásiporyndarynyń qaýymdastyǵy» zańdy tulǵalar birlestiginiń jetekshisi Sábıt Amanbaev.
Qazirgi ýaqytta qalada jolaýshylardyń 70 paıyzy qoǵamdyq kólikte jol aqysyn «Ońaı» kartasymen tólese, qalǵany qolma-qol esep aıyrysady eken.
Sholýshy: Gúlim Jaqan
