34 jastaǵy Juldyz Qystaýova Jezqazǵan túrmesine túsip, kenetten ol qaıtys boldy degen . Ólimniń sebebi: óz ózine qol salǵan. Alaıda týystary Juldyz ózin óltirdi degenge senbeıdi, dep habarlaıdy Qamshy aqparattyq agenttigi NewTimes.kz saıtyna silteme jasap.
Týystarynyń aıtýynsha, 7 sáýir kúni Juldyz Qystaýovany bir er adam zorlamaq bolǵan. Ózin qorǵaý maqsatynda jasalǵan is-áreketten Juldyz ol er adamdy óltirip alǵan.
«Úsh aı boıy meniń qyzym tergeý abaqtysynda jatty. Ony birese Qaraǵandyǵa, birese Jezqazǵanǵa tasyp júrdi», - deıdi Juldyzdyń anasy Marýza Jumabekova.
Onyń oıynsha, qyzyn aqtap alýǵa bolatyn edi nemese shartty jaza taǵaıyndalatyn edi. Sondyqtan da Juldyzdyń týystary tergeý jumystarynyń aıaqtalǵanyn tosyp, sot otyrysyn kútip júrgen. 26 maýsym kúni Juldyzdyń týystaryna onyń ólimi jaıly habar kelgen. Resmı qujattarda óz-ózine qol saldy dep kórsetilgen.
«25 maýsym kúni bir er adam habarlasyp aýrýdy basatyn dári alyp kelip berýdi ótindi. Al bir kún buryn Juldyzdyń ózi habarlasyp aıaǵy isip ketkendigin, soǵan qarsy dári alyp kelip berýdi ótingen bolatyn. 26 maýsym kúni onyń asylyp qalǵandyǵyn estidik», - deıdi onyń anasy.
34 jastaǵy áıeldiń anasy qyzynyń ózine qol saldy degenine senbeı otyr.
Birinshiden, onyń ózine qol jumsaıtyn oıy bar ekendiginen múldem habarsyz bolǵan. Úsh aı boıy týystary Juldyzben kezdese almasa da, apta saıyn odan hat alyp turǵan. Ol ózine barynsha saqtyqpen qarap, jaqyn arada úıge oralatyndyǵyn jazǵan.
«Onyń artynda 8 jáne 13 jastaǵy eki balalary qaldy. Olarǵa tek jaqsylyqqa úmittenip júrgendigin jazǵan. Jaqyn arada bostandyqqa shyǵyp, qastaryna oralatyndyǵyn aıtqan. Eshqandaı da óz-ózine qol jumsaýǵa qatysty birde-bir belgi joq», - deıdi Marýza Jumabekova.
Ekinshiden, Jumabekovanyń aıtýynsha, sýretterge qarap otyryp, ony qınap óltirgendigin kórýge bolady.
«Onyń denesiniń barlyǵy kógergen. Kóptegen syzattar bar, mıyna zaqym kelgen jáne de shashyna belgisiz suıyqtyq jaǵylǵan. Bas súıegi men tyrnaqtary synǵan, denesiniń ár jeri tilgilengen. Onyń máıitin bizge jerlegenge deıin kórsetken joq. Máıithanaǵa kirgizbeı tastady. Tek jerleýge daıyndalyp jatqan kezde ǵana biz bul sumdyq kartınany kórdik», - dep qosa ketti anasy.
Juldyz Qystaýovanyń ólimine qatysty óziniń shaǵymdaryn onyń týystary QR bas prokýratýrasyna joldady.
Daıyndaǵan: Nazerke Labıhan
