Phenán qurlyqaralyq balıstıkalyq zymyran ushyryp, Seýldi qıyn jaǵdaıda qaldyrdy dep habarlaıdy Qamshy aqparattyq agenttigi 24.kz-ke silteme berip. Bul týraly 24.kz-ke bergen suhbatynda ońtústikkoreıalyq qarýsyzdandyrylǵan aımaqty zertteý ınstıtýtynyń profesory Pak Óng Mın málimdedi. Onyń aıtýynsha, zymyran eki el úshin mańyzdy kúnde ushyrylyp otyr. Sebebi 1972 jyldyń 4 shildesinde Ońtústik pen Soltústik Koreıa jarty araldary arasynda birlesken málimdeme jarıalanǵan bolatyn. Qujattyń basty ıdeıasy – ekige bólingen Koreıa syrtqy kúshterdiń qatysýynsyz birigýi tıis. Ońtústik Koreıanyń elý mıllıonnan astam halqy bar. Onyń shamamen jıyrma mıllıony Seýlde turady.
El astanasy Soltústik Koreıa shekarasynan 50 shaqyrym jerde ornalasqan. Biraq profesordyń pikirinshe, Ońtústik Koreıaǵa eshqandaı qaýip tónip turǵan joq. Óıtkeni eldi qorǵaý úshin bar jaǵdaı jasalǵan jáne beıbit kelissózder júrgizý tájirıbesi de joq emes. Pak Óng Mın, qarýsyzdandyrylǵan aımaqty zertteý ınstıtýtynyń profesory: – Jaǵdaı qaýipti, óıtkeni soltústiktegi el ıadrolyq qarýdy jyldan jylǵa jetildirip keledi. Qurlyqaralyq balıstıkalyq zymyran bes myń shaqyrymnan asa qashyqtyqqa usha alady. Prezıdentimiz Mýn Chje In Soltústik Koreıamen beıbit kelissózder júrgizýge nıetti. Bul týraly ol AQSH Prezıdenti Donald Tramppen kezdesýi barysynda da aıtqan edi. Aq úı basshysy bul sheshimimen kelisti. Soltústik Koreıa ıadrolyq qarýdy taratpaýy tıis. Phenán tek osy shartty oryndaǵan kezde ǵana Mýn Chje Innyń strategıasy júzege asýy múmkin. Al búgingi zymyran ushyrýy Seýldy yńǵaısyz jaǵdaıda qaldyrdy-dep atap ótti.
