QR táýelsizdiginiń 25 jyldyǵy jáne Qazaq kóshiniń 25 jyldyǵy aıasynda «Álemde bar qazaqta bir otan bar» atty án jaryqqa shyqty dep habarlaıdy Qamshy.kz. Ibragım Eskendirdiń oryndaýyndaǵy án Dúnıejúzi qazaqtarynyń jalǵyz otany — Qazaqstan ekenin basa aıtady. Erlan Tóleýbaıdyń ánin Ibragım Eskendir oryndaǵan.
Qazaqstan táýelsizdik alýǵa sanaýly kúnder qalǵanda-aq, 1991 jyly 18 qarashada Qazaq KSR Joǵarǵy Keńesi «baıyrǵy ult adamdarynyń basqa respýblıkalardan jáne shet elderden Qazaq KSR-yna kóship kelýi tártibi men sharttary týraly» qaýly qabyldady. Bul zańnyń aıasynda Atajurtqa uly kósh bastaldy. Prezıdent Nazarbaevtyń «Qazaqstan - álemdegi barsha qazaqtyń qutty qara shańyraǵy» degeni qandastarymyzdyń kóshine qamshy basty.
Alǵashqylardyń biri bolyp jetken abyz aqsaqal Halıfa Altaı týǵan jerdiń topyraǵyn mańdaıyna basyp, súıip sájde etti. Túrkıadan, Monǵolıadan arnaýly ushaqtarmen kóshtiń aldy kele bastady. Atajurtty ańsaǵan kózi ashyq, kókiregi oıaý, múmkindigi bar azamattar esh irkilmesten attarynyń basyn Atamekenge burdy. Onyń dáleli Mustafa Óztúrik sıaqty álemdi moıyndatqan, ataq pen abyroıǵa ıe azamattardyń elge kelýi.
Shetel qazaqtarymen birge qara shańyraqqa tarıhı mádenıetimiz, ulttyq ádebıetimiz, asyl mura án men bıimiz, kúı men jyrymyz oraldy. Aldyńǵy býyn ózi qanattanǵan jurttan kórgen óner-bilimin, ǵylymy men tehnıkasyn eldiń ıgiligine jaratty. Memleket sheteldegi qandastarymyzdy shaqyryp qana qoıǵan joq, jat jurtta jutylyp ketpesin dep jastaryn oqytýdy qolǵa aldy. Sheteldegi qazaq jastary Atajurtta tegin bilim alyp, eńbekke aralasty. Shetelden kelgen aǵaıyn Atajurtynyń gúldenýine ekonomıkalyq, demografıalyq, rýhanı, ádebı-mádenı úles qosyp, qazaqtyń keregesi keńeıip, qabyrǵasy bútindele tústi.
Osynyń nátıjesin, kóshi-qonnyń jetistigin 2014 jyly Elbasy «Biz 1 mıllıon aǵaıyndy elge qaıtardyq!» dep maqtanyshpen jarıalady. Dúnıejúzi qazaqtarynyń V quryltaıynda da Elbasy Nazarbaev álemdegi qazaqtardy Atajurtqa oralýǵa shaqyrdy.
Patrıottyq ándermen tanylyp júrgen Ibragım Eskendirdiń oryndaýyndaǵy jańa án de barsha qazaqtarǵa Atajurtqa oralýdy nasıhattaıdy.
