QR Aýyl sharýashylyǵy mınıstrliginiń shaqyrtýymen Qytaı Halyq Respýblıkasy aýyl sharýashylyǵy mınıstriniń Astana qalasyna resmı jumys sapary bastaldy dep habarlaıdy Qamshy aqparattyq agenttigi.
Sapar barysynda QR Premer – Mınıstriniń Orynbasary – Aýyl sharýashylyǵy mınıstri A.I. Myrzahmetov pen Qytaı Halyq Respýblıkasy Aýyl sharýashylyǵy mınıstri Han Chanfýdyń ekijaqty kezdesýi jáne Qazaq-Qytaı agrarlyq ınvestısıalyq forýmy boıynsha birneshe is-sharalar ótkizildi.
Ekijaqty kezdesý barysynda Qazaqstan men Qytaı aýyl sharýashylyǵy salasy boıynsha áriptestigi, ásirese, veterınarıa jáne organıka jónindegi ózekti máseleleri, birlesken ınvestısıalyq jobalary talqylandy.
Forýmdy eki eldiń aýyl sharýashylyǵy Mınıstrleri ashty. Atalǵan forýmnyń jumysyna 100-den asa bıznes, bilim jáne ǵylym ókilderi qatysty.
Qytaı Halyq Respýblıkasy Qazaqstanǵa jalpy ekonomıkalyq, onyń ishinde agroónerkásiptik keshenin damytý turǵysynda mańyzdy strategıalyq áriptesteriniń biri bolyp tabylady.
Aǵymdaǵy jyldyń maýsym aıynda Astana qalasynda ótken QR Prezıdenti N.Á.Nazarbaev pen QHR Tóraǵasy Sı Szınpınmen bolǵan kezdesý barysynda da Qazaqstan men Qytaı arasynda aýyl sharýashylyǵy taýarlaryn óńdeý jáne ınvestısıa tartý mańyzdylyǵy birneshe ret aıryqsha atalyp ótken bolatyn.
Osy jyldyń aqpan aıynda qabyldanǵan QR Agroónerkásiptik keshenin damytýdyń 2017-2021 jyldarǵa arnalǵan Memlekettik baǵdarlamasy barysynda aýyl sharýashylyǵy taýarlaryn óńdeý boıynsha ekijaqty yntymaqtastyq jumystaryn júrgizý jalǵasyn tabýda.
Forým barysynda AÓK-ke 160 mln. dollar kóleminde ınvestısıa
tartý jáne saýda boıynsha yntymaqtastyq jónindegi 7 qujatqa qol qoıyldy. QR Aýyl sharýashylyǵy mınıstrligi men QHR Aýyl sharýashylyǵy mınıstrligi argarlyq yntymaqtastyq aıasynda «Úlgilik aımaq» qurý boıynsha ózara túsinistik týraly Memorandým jasasty.
«Agrarlyq yntymaqtastyq boıynsha «Úlgilik aımaq» kásiporyndarǵa aýyl
sharýashylyǵy salasynda jańa ınovasıany engizetin bolady. Atalǵan joba «Ulttyq agrarlyq ǵylymı bilim berý ortalyǵy» Komersıalyq emes aksıonerlik qoǵamy bazasynda júzege asyrylady»,- dep atap ótti A.Myrzahmetov.
Budan bólek, Forým sheńberinde Qytaı eline qazaqstandyq aýyl sharýashylyǵy ónimderin jetkizý boıynsha «Azyq túlik korporasıasy» AQ Ulttyq kompanıasymen birneshe kelisimderge qol qoıyldy.
- Xi'an Aijugrain & Oil Industry Group Co Ltd kompanıasy arasynda dándi daqyldar men maıly daqyldar saýdasy boıynsha ózara yntymaqtastyq týraly Kelisim;
- Zhongxinjian LLC kompanıasy arasynda saýda-sattyq boıynsha Memorandým;
- Xinjiang Zhaofenghe Bio-technology Co kompanıasy arasynda dándi daqyldar saýdasy boıynsha ózara yntymaqtastyq týraly Kelisim.
Bul kelisimder QHR-ge 200 myń tonna dándi-daqyl jáne 100 myń tonna maıly daqyldardy eksporttaýǵa sonymen qosa, atalǵan dándi-daqyl túrlerin shekaralyq aımaqta saqtaıtyn termınal qurýǵa múmkindik beredi.
Forýmda taǵy bir qol qoıylǵan Memorandým "Jannýr-Astana Grýpp" JSHS men Qytaıdyń «Tınán Inhaı Henan ólkesi» tuqym óndirý kompanıasy arasynda aýyl sharýashylyǵy salasynda yntymaqtastyq jóninde boldy. Atalǵan Kelisim QR aýmaǵynda dándi-daqyldardy óńdeýdiń onyń ishinde tuqym sharýashylyǵynda tehnologıany transfertteýdiń tolyq sıklyn jasaıdy.
Qazirgi tańda buryn qol qoıylǵan Kelisimder boıynsha raps maıyn, sút, et, qyzanaq jáne basqa da aýyl sharýashylyǵy ónimderin óńdeý boıynsha birikken ınvestısıalyq jobalar júzege asyrylýda. Budan bólek, Citic Group kompanıasymen júrgizgen yntymaqtastyq barysynda bıdaı jáne bıdaıdyń sabanyn óńdeý boıynsha eki úlken joba iske asyrylyp jatyr.
Sonymen qatar, S.Seıfýllın atyndaǵy QazATÝ men Qytaıdyń XISEN kompanıasy arasynda kartop ósiretin tájirıbelik demonstratıvti stasıonar qurý boıynsha Kelisimge jáne osy ýnıversıtetpen Qytaıdyń Soltústik-Batys aýyl jáne orman sharýashylyǵy ýnıversıteti arasynda birikken agrotehpark qurý jóninde Kelisimge qol qoıyldy.
