Germanıa prezıdenti Frank-Valter Shtaınmaıer resmı is-saparmen Astanaǵa keldi. Shtaınmaıer prezıdent bolyp saılanǵannan keıin Astanaǵa resmı saparmen alǵash kelýi, dep habarlaıdy Qamshy.kz tilshisi.
Shetel delegasıasyn Qazaqstan Prezıdentiniń rezıdensıasynda qarsy aldy.
«Qazaqstanǵa qosh keldińiz. Prezıdent bolyp saılanǵannan keıin Qazaqstanǵa alǵashqy resmı saparmen kelgenińizge qýanyshtymyn. Ári EKSPO-2017 kórmesin aralaımyn depsiz. Sizdi prezıdent etip saılaǵanyna óz basym qýanyshtymyn», - dedi Nursultan Nazarbaev.
Al buǵan deıin ol osy eldiń Syrtqy ister mınıstri qyzmetin atqarǵan. Sondaı-aq, Elbasy eki memlekettiń arasyndaǵy tyǵyz dostyq qarym-qatynasyn aıta ketip, sheteldik áriptesine degen qurmetin bildirdi.
«Siz álemge tanymal saıasatkersiz, kóńildi, syıly adamsyz. Meniń oıymsha, sizdi prezıdent etip saılaǵan Germanıa halqynyń baǵy bar», - deı kele Shtaınmaıerdiń Syrtqy ister mınıstri qyzmetinde bolǵan ýaqytta kezdesip, túrli máselelerdi talqylaǵan kúnderin eske túsirdi.
Prezıdenttiń aıtýynsha, búgin Qazaqstan men Germanıanyń iskerlik keńesi aıasynda 20 kelisim rásimdeldi. Sóıtip, eki basshy EKSPO kórmesine baryp, pavılondardy aralap shyqty.
Óz kezeginde Frank-Valter Shtaınmaıer qonaqjaılyq úshin alǵys bildirip, Qazaqstanǵa prezıdent bolyp kelgenine qýanyshty ekenin jetkizdi.
«Men buǵan deıin de Qazaqstanda bolǵanmyn. Alaıda prezıdent retinde alǵash ret kelip otyrmyn. Bul jaqqa kelgenimniń sebepteri kóp. Qazaqstandy men jaqsy bilemin. Alaıda bıylǵy jyldyń jóni bólek. Sebebi Germanıa men Qazaqstan arasyndaǵy dıplomatıalyq qarym-qatynastarǵa 25 jyl tolyp otyr. Osy ýaqyttyń ishinde talaı jumystar atqaryldy. Búginde Germanıanyń biraz kompanıalary EKSPO kórmesine qatysyp jatyr. Osynyń ózi eki memlekettiń arasyndaǵy tyǵyz qarym-qatynastyń kórinisi», - dedi Shtaınmaıer.
Sholýshy: Gúlim Jaqan
