Mańǵystaý oblystyq densaýlyq saqtaý basqarmasynyń burynǵy basshysy Maral Qadyrdyń isi Mańǵystaý oblystyq qylmystyq ister jónindegi sot alqasynda qaraldy, - dep habarlaıdy Qamshy.kz.
Qaıta qaralǵan úkimge saı,  eks-basshysynyń kámeletke tolmaǵan qyzy eskerilgen.

«Aqtaý qalalyq sotynyń 2017 jyldyń 5 mamyryndaǵy «QR Qylmystyq kodeksiniń 366-babynyń 3-bóliginiń 1,4-tarmaqtary boıynsha Maral Qadyrdy aıypty dep tanyp, jeti jylǵa bas bostandyǵynan aıyrǵan» úkimi ózgerdi. Qazaqstannyń Qylmystyq kodeksiniń 55-babynyń 4-bóligin qoldaný arqyly oǵan bes jylǵa bas bostandyǵynan aıyrý jazasy taǵaıyndaldy. Úkimniń qalǵan bóligi ózgerissiz qalady, sottalýshy men onyń qorǵaýshysynyń apelásıalyq shaǵymy, sondaı-aq, prokýrordyń apelásıalyq narazylyǵy qanaǵattandyrylmady», - dep málimdegen Mańǵystaý oblystyq sotynyń baspasóz qyzmetiniń ókili Gaýhar Nurhanova. 

Maral Qadyr 2016 jyldyń tamyz aıynda Mańǵystaý oblystyq densaýlyq saqtaý basqarmasy basshysy bolyp taǵaıyndalǵan bolatyn. Onyń aldynda uzaq jyldar oblystyń bas sanıtary qyzmetin atqarǵan. Maral Qadyrdy 5 mamyrda Aqtaý qalalyq soty 7 jylǵa bas bostandyǵynan aıyrdy. Sondaı-aq múlki tárkilenip qana qoımaı, belgili bir qyzmetterge turýdan ómir boıyna shettetilgen.