Memleket basshysyna Ispanıa Koroli VI Felıpeniń atynan Katolıktik Izabella Ordenin Ispanıa Koróldigi Depýtattar kongresiniń tóraıymy Ana Pastor tabys etti, dep jazady Qamshy.kz aqparat agenttigi. Bul týraly Aqordanyń baspasóz qyzmeti habarlaıdy.

«Asa mártebeli Qazaqstan Respýblıkasynyń Prezıdenti Nursultan Nazarbaev myrza, joǵary koróldik qurmet retinde, Sizdi Katolıktik Izabella Ordenimen marapattaımyn», – delingen Koróldiń jarlyǵynda.

Qazaqstan Prezıdenti Ispanıa Koroli VI Felıpege jáne Ana Pastorǵa joǵary marapaty úshin rızashylyq bildirip, Qazaqstan men Ispanıa arasynda senimdi ári dostyq qarym-qatynas ornaǵanyn atap ótti.

– Biz táýelsizdigimizdiń alǵashqy kúnderinen bastap Ispanıa Koróldigimen baılanys ornatyp, ózara senimdi ekijaqty qarym-qatynastarǵa qol jetkizdik. Osy jyldar ishinde Ispanıa Qazaqstanǵa óz qoldaýyn kórsetip keledi. Ispanıa Koroli VI Felıpe Qazaqstanǵa resmı saparmen kelip, «EKSPO-2017» halyqaralyq kórmesiniń ashylýyna qatysty. Bul biz úshin zor mártebe, – dedi Qazaqstan Prezıdenti.

Nursultan Nazarbaev Qazaqstannyń saıasatta jáne ekonomıkanyń túrli sektorlarynda Ispanıamen jemisti yntymaqtastyqty jalǵastyrýǵa nıetti ekenin aıtty.

Rásim sońynda Qazaqstan Prezıdenti Ispanıa Koroli VI Felıpege shynaıy rızashylyǵy men jyly lebizin jetkizýdi surady jáne Ispanıa halqynyń ıgiligi úshin atqaryp jatqan qyzmetine tabys tiledi.