Qazaqstan Respýblıkasynyń Syrtqy ister mınıstri Qaırat Ábdirahmanov Ujymdyq qaýipsizdik týraly sharty uıymynyń Syrtqy ister mınıstrler Keńesiniń otyrysyna qatysty, dep jazady Qamshy.kz aqparat agenttigi. Bul týraly QR SİM baspasóz qyzmeti habarlaıdy.
Syrtqy saıası vedomstvolar basshylarynyń otyrysy barysynda jahandyq jáne óńirlik qaýipsizdiktiń ózekti máseleleri, sondaı-aq Belarýste jyldyń ekinshi jartysynda josparlanǵan UQSHU Samıtiniń mereıtoıyna daıyndyq talqylandy.
Q. Ábdirahmanov óz baıandamasynda Qazaqstan negizinde transulttyq sıpattaǵy qazirgi syn-qaterler men qaýipterge qarsy kúres boıynsha birikken sharalarǵa zor mańyz beretinin atap ótti. Ol kıberqaýipsizdik jáne aqparattyq tehnologıalardy zańsyz paıdalaný máselelerine aıryqsha kóńil bóldi, sonymen qatar Prezıdent Nursultan Nazarbaevtyń bastamasymen Qazaqstanda ártúrli aýqymdaǵy hakerlik shabýyldardan qorǵaý maqsatynda qurylatyn «Kıberqalqan» júıesi týraly aıtty.
Bul turǵyda syrtqy saıası vedomstvo basshysy kompúterlik tosyn oqıǵalarǵa den qoıý boıynsha UQSHU Úılestirý konsýltasıalyq ortalyǵynyń qyzmetin jandandyrýdy, sondaı-aq strategıalyq obektilerdiń qorǵalý deńgeıin joǵarylatý úshin jańa zerttemeler boıynsha tájirıbeler, aqparattar almasýda sarapshylarmen is júzinde ózara is-qımyl jasaýdy jolǵa qoıýdy usyndy.
Sonymen qatar, Qazaqstannyń Syrtqy ister mınıstri ekstremızm men terorızmge qarsy kúres ulttyq deńgeıde júrgizilip jatqan jumystar týraly aqparat berdi.
UQSHU múshe memleketter SİM basshylarynyń nazary qaıtadan Qazaqstan basshysynyń BUU sheńberinde tıisti bastamalaryna aýdaryldy.
Kezdesý qatysýshylary Sırıadaǵy jaǵdaıdy retteý boıynsha Astana prosesiniń barysy týraly aqparattandyryldy.
Otyrys barysynda qazaqstandyq tarap bastamashylyq jasaǵan áskerı-tehnıkalyq yntymaqtastyqtyń negizgi qaǵıdattary týraly Kelisimge ózgerister maquldandy. Atap aıtqanda, áriptesterge jeńildekti sharttarda tasymaldanatyn áskerı maqsattaǵy ónimderge baǵa belgileý tártibi aıqyndalady.
UQUSH múshe memleketteriniń syrtqy ister mınıstrleri Aqparattyq qaýipsizdikti qamtamasyz etý boıynsha birlesken sharalar týraly málimdeme qabyldady, onda aqparattyq tehnologıalardy qoldaný arqyly jasalǵan qylmystyń ósýine alańdaýshylyq atap ótiledi. Taraptar atalǵan saladaǵy qylmystarǵa qarsy kúres boıynsha belsendi jumystardy jalǵastyrý nıetterin bildirdi.
UQUSH SİMK janyndaǵy Aýǵanstan boıynsha jumys tobynyń qyzmetin jandandyrý týraly sheshim qabyldandy.
Kezdesý qorytyndysy boıynsha 2017 jylǵa arnalǵan birlesken málimdemeler taqyryptarynyń tizbesi jáne UQSHU múshe memleketteri ókilderiniń 2017 jylǵy ekinshi jartyjyldyqqa jáne 2018 jylǵy birinshi jartyjyldyqqa arnalǵan syrtqy saıasat, qaýipsizdik jáne qorǵanys máseleleri boıynsha konsýltasıalarynyń jospary bekitildi.
Sondaı-aq, delegasıa basshylary jáne UQUSH bas hatshysy Belarýs Respýblıkasynyń prezıdenti Aleksandr Lýkashenkomen kezdesti.
