Úsh attap sekirýden Olımpıada chempıony Olga Rypakova Bırmıngemde ótip jatqan "Gaýhar lıga" saıysynda úshinshi oryn aldy,- dep habarlaıdy Qamshy.kz aqparat agenttigi Vesti.kz saıtyna silteme jasap.
Rypakova tórtinshi múmkindiginde úzdik nátıje kórsetti - 14,29 metr. Birinshi oryndy kolýmbıalyq Katrın Ibargýen 14,51 metr kórsetkishimen aldy. Ekinshi oryn ıamaıkalyq Kımberlı Ýılámsqa (14,44) buıyrdy. Lıganyń jalpy esebinde de Rypakova 20 upaımen úshinshi oryn alyp tur. Al Ibargýen (31) kósh bastap tur, onyń sońynda Ýıláms (24) kele jatyr.
Eske salaıyq, Rypakova Londonda ótken jeńil atletıkadan álem chempıonatynda qola medal jeńip alǵan bolatyn. Qazaqstandyq maýsymdaǵy jeke úzdik nátıjesin kórsetken edi - 14,77 metr.
