Showtime telearnasynyń sarapshysy ári komentatory El Bernshteın WBA (Super), IBO, WBC jáne IBF tujyrymdary boıynsha orta salmaqtaǵy álem chempıony qazaqstandyq Gennadıı Golovkın (37-0, 33 KO) men meksıkalyq Saýl "Kanelo" Alvarespen (49-1-1, 34 KO) ótetin jekpe-jekke qatysty boljamyn aıtty, - dep habarlaıdy Qamshy.kz aqparat agenttigi Vesti.kz saıtyna silteme jasap.

"Keremet ári áserli jekpe-jek bolady dep oılaımyn, sebebi eki boksshy da bir-birine jaqyn turyp soqqy jasaı alady. Denıel Djeıkobs Golovkınmen jaqsy judyryqtasty, al "Kanelo" ondaı qımyldar jasamaıdy. Olar jaqyn qashyqtyqta júrip soqqy jasaıdy", - deıdi sarapshy. 

El Bernshteınniń aıtýynsha, Alvares Golovkınniń myqty soqqysyna shydaı ala ma, joq pa belgisiz. "Qandaı jaǵdaı bolsyn biz tamasha jekpe-jek kóremiz, sebebi ekeýi de kúshti soqqy jasaı alady, naǵyz atys bolaıyn dep tur", - deıdi El Bernshteın.

Sondaı-aq, ol osy jekpe-jekte Golovkın jeńiske jetedi degen boljam jasady.

"Meıvezer men MakGregordyń shoýy Golovkın-Alvares jekpe-jeginiń PPV satylymyna zıanyn tıgize me, bilmeımin. Biraq, meńinshe, Golovkınniń jekpe-jegine jetkilikti adam barady. Sebebi bul jekpe-jekti barlyǵy kútip otyr. Eki kezdesý bir-birine kedergi bolmaıdy dep oılaımyn", - dedi Bernshteın On The Ropes Boxing Radio.kz basylymyna bergen suhbatynda.

Aıta keteıik, MakGregor men Meıvezer arasyndaǵy kezdesý 26 tamyz kúni Las-Vegastaǵy T-Mobile Arena sport kesheninde boks erejesi boıynsha ótedi. Bul jekpe-jektiń uıymdastyrýshylary kezdesýden 500 mıllıon dollar tabamyz dep josparlap otyr. AQSH jerinde kezdesýdi Showtime arnasy aqyly júıe (PPV) boıynsha kórsetedi.

Al Golovkın - Alvares jekpe-jegi 16 qyrkúıekte Las-Vegasta 20 myń adamdyq T-Mobile arenasynda ótedi. Boks keshine barlyq bılet satylyp qoıdy.