AQSH prezıdenti Donald Tramp pen Japonıa premer-mınıstri Sındzo Abe Phenánnyń zymyrandy synaǵan áreketinen soń Soltústik Koreıaǵa qarsy qysym kórsetýde kúsh biriktirý úshin kelisimge keldi dep jazady Qamshy.kz aqparat agenttigi.

«Olardyń zymyrandy Japonıanyń ústinen ushyrǵanyn ashyq túrde qoqan-loqy kórsetkeni dep túsindik, bul áreket eldegi beıbitshilik pen qaýipsizdikke zalalyn tıgizýi múmkin», – dep málimdedi Abe Tokıoda ótken BUU Qaýipsizdik Keńesiniń jedel otyrysynda.

Japonıa bıliginiń habarlaýynsha, zymyran Hokkaıdo aralynyń mańyndaǵy teńizdiń ústine qulaǵan. 550 shaqyrym bıiktikte 250 shaqyrym qashyqtyqty ushyp ótken zymyran Soltústik Koreıanyń mamyrda málim etken AQSH aýmaǵyna deıin jetetin orta qashyqtyq zymyranynyń qýatyna uqsas ekeni anyqtaldy.

Pentagon zymyrannyń Soltústik Amerıkaǵa qaýip tóndirmeıtinin aıtqan. Alaıda AQSH basshylar komıtetiniń tóraǵasy odaqtastardyń KHDR-ǵa qarsy «kúshti jaýap» qaıtarý kerek ekenin eskertti.