EXPO-2017 ulttyq kórmesi aıasynda ótetin boks dodasyna Almaty oblysynan 100-den astam adam avtosherýmen jol tartty, dep habarlaıdy Qamshy.kz aqparat agenttigi.
Astanada 9 qyrkúıekte Qanat Islam men Brendon Kýktyń jekpe-jegi ótedi. Sonymen qosa, Janqosh Turarov, Rýslan Myrsataev, Jánibek Álimhanuly, Álı Ahmedov syndy boksshylar sharshy alańda óz baqtaryn synaıdy. Almaty oblysynan shyqqan jankúıerler ózderin «Qazaq batyrlaryn qoldaýǵa shyqtyq» dep sıpattaıdy.
Taldyqorǵanda qaıyrymdylyqpen aınalysyp, kóshi-qon máselesinde qandastarǵa quqyqtyq kómek kórsetip júrgen qoǵam belsendisi Dáýletjan Shaımaran bastaǵan jankúıerler «Qamshy» tilshisine Astanaǵa «3 avtobýs, 6 jeńil kólikpen jankúıerlerdiń attanǵanyn» habarlady.
Aıta ketetin bolsaq, sanaýly kúnnen keıin 33 jasqa tolatyn qandasymyz Qanat Islam sońǵy kezdesýin Amerıkanyń Delaver shtaty Ýılmıngton qalasynda brazılıalyq boksshy Robson Assıspen ótkizip, qarsylasyn alǵashqy mınýtta-aq qulatyp salǵan bolatyn.
Qanat Islam kásipqoı boksqa 2012 jyly aýysyp, sol ýaqyttan beri eshkimge des bergen joq. Ol ózi ótkizgen 24 kezdesýdiń barlyǵynda jeńiske jetti. 20 ret qarsylasyn nokaýtqa túsirdi. Sońǵy kezdesýi qandasymyzdyń AQSH jerinde ótkizgen tórtinshi jekpe-jegi. Ol WBO Intercontinental jáne WBA Fedelatin tujyrymdary boıynsha Álem chempıony.
Óziniń ashyq jattyǵýy aıasynda Qanat Islam tilshilerge bergen suhbatynda «Bizdiń jattyǵý lagerimiz keremet boldy. Óz-ózime senimdimin jáne jeńiske jetýge daıynmyn. Alda bolatyn jekpe-jekti taǵatsyzdana kútip júrmin. Bul – meniń úıim jáne men jeńemin», – degen edi.
