Búgin EKSPO-2017 Halyqaralyq mamandandyrylǵan kórmesi aıasynda Birikken Arab Ámirlikteriniń Ulttyq kúni atap ótildi. Memleket jańartylatyn energıa kózderi salasyndaǵy birqatar jobalardy qoldaý jáne qarjylandyrý arqyly tájirıbesimen bólisti. Bul turǵyda memlekettiń Tynyq muhıt Seriktestik Qory, Abý-Dabı damý qory jáne Jańartylatyn energıa kózderi jónindegi halyqaralyq agenttikpen (IRENA) yntymaqtastyǵy BAÁ-niń halyqaralyq deńgeıdegi bedelin jáne ekologıalyq taza energıa salasyndaǵy sheshimderdi daıyndaýdaǵy úlesin kórsetedi. Bul týraly Ulttyq kúndi merekeleý barysynda BAÁ Ulttyq Buqaralyq aqparat quraldary Keńesiniń Bas dırektory Mansýra Al Mansýrı málimdedi, dep habarlaıdy Qamshy.kz aqparat agenttigi EKSPO-2017 kórmesniń medıa-ortalyǵyna silteme jasap.
Jıynnyń resmı bóliginde sóz sóılegen Mansýra Al Mansýrı Birikken Arab Ámirlikteriniń EKSPO-2017 Kórmesine qatysýy bolashaq energetıka salasyn qalyptastyrýdaǵy, sondaı-aq «Bolashaq energıasy» taqyrybyndaǵy ózge elderdiń ozyq tájirıbelerin, negizgi tendensıalary men tehnologıalaryn zertteý salasyndaǵy eldiń úlesin kórsetýge biregeı múmkindik bergendigin atap ótti.
«EKSPO-2017 Kórmesi jańartylatyn energıany, jasyl ekonomıkany damytý mańyzdylyǵyn sondaı-aq atalǵan baǵyt boıynsha jańa tehnologıalardy engizý qajettiligin kórsetti. Bul balamaly energıa kózderine erekshe kóńil bólingen BAÁ-niń energetıkalyq resýrstardy ártúrlendirý boıynsha strategıasynda kórinis tapty. Atalǵan strategıa kún, sý jáne jel sıaqty energıa kózderiniń qolaıly balansyn qurýǵa baǵyttalǵan. Atqarylǵan jumys nátıjesinde Jańartylatyn energıa kózderi jónindegi halyqaralyq agenttiginiń shtab-páteri BAÁ astanasy Abý-Dabıda quryldy», - dep qorytyndylady Mansýra Al Mansýrı.
Óz kezeginde Qazaqstan Respýblıkasy Investısıalar jáne damý mınıstriniń orynbasary Tımýr Toqabaev EKSPO-2017 Kórmesi jasyl tehnolorgıalar, mádenıetti damytý jáne qorshaǵan ortany qorǵaý salalaryndaǵy jetistikterdi usyný úshin tamasha múmkindik ekendigin atap ótti. Sondaı-aq, Tımýr Toqabaev eki el 25 jyl arlyǵynda energetıka salasy jáne basqa da kóptegen baǵyttar boıynsha ózara tyǵyz qarym-qatynas ornatqanyn eskerip ótti. Sońǵy jyldary eki el arasyndaǵy saıası jáne saýda-ekonomıkalyq yntymaqtastyq belsendi damyp keledi.
«Halyqaralyq qarjy ortalyǵyn EKSPO aýmaǵynda qurý barysynda Dýbaıdyń tájirıbesi óte mańyzdy boldy. Nátıjesinde Birikken Arab Ámirlikteri ınvestorlary úshin de jańa múmkindikterge jol ashylady jáne BAÁ azamattary úshin qoldanystaǵy vızasyz rejım barlyq baǵyttar boıynsha yntymaqtastyqty damytýǵa yqpalyn tıgizedi», - dedi Tımýr Toqabaev.
Birikken Arab Ámirlikteri damyǵan elder qataryndaǵy Germanıa, Fransıa, AQSH jáne Aýstralıamen birge Jańartylatyn energıa kózderi jónindegi keńeske múshe. BAÁ Ulttyq pavılony klımatty baqylaý salasyndaǵy sheshimderdi jáne energetıka salasyndaǵy negizgi jahandyq bastamalardy usynady. Sondaı-aq bolashaqta ulttyń damýy men órkendeýine yqpal etetin birqatar zertteý jobalary men josparlary kórsetilgen.
