6 qyrkúıekte Memleket basshysy Qazaqstan-Polsha bıznes-forýmyna qatysty, dep habarlaıdy Qamshy.kz aqparat agenttigi.

Aqordanyń málimetine súıensek, formýǵa eki el bıznesiniń 450-den astam ókili qatysty. Qazaqstan Prezıdenti jıynǵa qatysýshylar aldynda sóılegen sózinde elderimizdiń saýda-ekonomıka salasyndaǵy yntymaqtastyǵyn damytýdyń mańyzdylyǵyn aıtyp, bul qarym-qatynasty keńeıtýge áleýetimizdiń jetkilikti ekenin atap ótti.

Memleket basshysy qolaıly ınvestısıalyq ahýaldy qalyptastyrý úshin Qazaqstanda qabyldanyp jatqan sharalarǵa jáne onyń nátıjelerine toqtaldy.

– Polsha azamattary Qazaqstanda vızalyq talaptardan bosatylǵan. Shaǵyn jáne orta bıznesti, mashına jasaý jáne aýyl sharýashylyǵyn damytý jóninde jumys toptary quryldy. Elderimiz arasynda jumys istep jatqan úkimetaralyq komısıanyń róli mańyzdy, – dedi Qazaqstan Prezıdenti.

Sonymen qatar, Nursultan Nazarbaev elimizdiń jańa ekonomıkalyq «Jibek joly» qurylysyna qatysýy jóninde aıtyp, ekijaqty ekonomıkalyq yntymaqtastyq aıasynda iske asyrylyp jatqan Qazaqstan-Polsha jobalaryna toqtaldy.

– «Polfarma» farmasevtıkalyq kompanıasy tabysty seriktestiktiń jarqyn mysaly sanalady. «Astana – jańa qala» arnaıy ekonomıkalyq aımaǵynda «Selena grýpp» kompanıasy qurylys materıaldaryn shyǵaratyn jobany iske asyrdy. «QazTehMash» zaýyty «Pronar» polák tehnologıasyn qoldana otyryp, Petropavlda aýyl sharýashylyǵy tehnıkalaryn jasaýǵa kiristi. Jalpy, Qazaqstanda polák kapıtalynyń qatysýymen 115 kásiporyn jumys isteýde, – dedi Memleket basshysy.

Nursultan Nazarbaev ekonomıkalyq qarym-qatynasty odan ári damytýǵa múddelilik tanytyp, Qazaqstanda aldaǵy kezeńde bıznes júrgizýge sebep bolatyn birqatar máseleni atap ótti.

– Prezıdent janynda Sheteldik ınvestorlardyń keńesi jumys isteıdi. 61 eldiń azamattary úshin vızasyz rejim engizilgen. 10 arnaıy ekonomıkalyq aımaq pen 20-ǵa jýyq ındýstrıalyq aımaq jumys isteýde. Memleket osy aımaqtardyń jumysyna qatysýshylardy qajetti ınfraqurylymmen qamtamasyz etip otyr. Olarǵa salyq jeńildikteri men artyqshylyqtar berilgen. Budan bólek, jer qoınaýyn paıdalanýǵa lısenzıa alý jáne shartqa otyrý tártibi jeńildetildi, – dedi Qazaqstan Prezıdenti.

Sondaı-aq, Memleket basshysy polák bıznesmenderin elimizdegi kásiporyndardyń aktıvterin jekeshelendirýge qatystyrý arqyly yntymaqtastyqty nyǵaıtý jáne agrarlyq sektorda qarym-qatynas ornatý múmkindikterine toqtaldy.

Nursultan Nazarbaev Qazaqstannyń jedeldetilgen jańǵyrý úderisi ekonomıkalyq baılanystardy keńeıtýdiń qosymsha múmkindigi bolyp sanalatynyn aıtty.

– Biz iskerlik týrızmnen ekologıalyq jáne rýhanı týrızmge deıingi týrızmniń barlyq túrin damytýǵa zor mán beremiz. Tikeleı áýe qatynasynyń ornaǵanyn eskerip, ózara yntymaqtasýǵa jáne týrısik ónimderdi ilgeriletýge múddelimiz. «EKSPO» kórmesi aıaqtalǵan soń onyń bazasynda «Astana» halyqaralyq qarjy ortalyǵy jumysyn bastaıdy. Sondaı-aq, «EKSPO» bazasynda Jasyl tehnologıalar men ınvestısıalardy damytý jónindegi halyqaralyq ortalyq jumys isteıtin bolady, – dedi Nursultan Nazarbaev.

Sońynda Qazaqstan Prezıdenti bıznesti damytý jáne ózara tıimdi seriktestikti nyǵaıtý úshin bıznesmenderdi barlyq múmkindikti paıdalanýǵa shaqyrdy.