EKSPO kórmesi kezindegi qaýipsizdik sharalaryna eldiń túkpir-túkpirinen 9 myńǵa jýyq saqshy tartyldy. Alaıda olardyń barlyǵy birdeı jumys istep kete almady. Sózge kelip qalǵan eki saqshy jumystan qýyldy, dep xabarlaıdy Qamshy.kz aqparat agentigi QazAqparatqa silteme jasaı otyryp.

«Eregesip qalǵan ekeýdiń oqıǵasy bylaı órbigen. Máselen, men jol-patrýldik polısıanyń serjanty bolsam, sen qorǵanys mınıstrliginiń serjanty retinde kórmege kelesiń. Ekeýimiz bir narádta júrmiz. Bireýi ekinshisine buıryq berip, anda bar deıdi. Mynaý sen maǵan bastyq emessiń dep kelispeıdi. Sodan ekeýi bir-birin ıtergen... Aqyry ekeýi de jumystan qýyldy. Negizi, ondaı jaǵdaılar volonterler arasynda da, jeke kúzet qyzmekterleri arasynda da bolǵan», - dedi QR İİM Ákimshilik polısıa komıteti tóraǵasynyń orynbasary Talǵat Musaqanov.

Onyń aıtýynsha, kórme qaýipsizdigine tartylǵan 9 myń saqshynyń ishinde ishki ister organdary, qorǵanys mınıstrligi men áskerı oqý oryndarynyń kýrsanttary bar.  «Negizi, áskerı tártipti óreskel buzý faktileri bolmaǵan. Psıxologtar da óz jumysyn atqardy, áli de atqaryp jatyr. Olar san alýan aýtotrenıngter men saýalnamlardy júrgizedi. Barlyq saqshylar tıisti ýaqytta demalysqa shyqty. Mádenı baǵdarlamalarǵa da qatysty", - dep atap kórsetti tóraǵanyń orynbasary.