Kásipqoı bokstaǵy alǵashqy kezdesýinde Kemrı Maksıdi jeńgen Balaýsa Muzdıman óz áserimen bólisti, - dep habarlaıdy Qamshy.kz aqparat agenttigi Qsport.kz portalyna  silteme jasaı otyryp.  

AQSH-tyń Monro qalasynda ótkizgen jekpe-jeginde otandasymyz qarsylasyn alǵashqy raýndta-aq soqqylarynyń astyna alyp, jekpe-jekti ýaqytynan buryn aıaqtady. 

«Kásipqoı bokstaǵy alǵashqy jeńisime osylaı jetkenime óte qýanyshtymyn. Amerıkalyq boksshy qyzdy óte myqty dep oılaǵanmyn, alaıda birinshi raýndta nokdaýnǵa túskennen keıin, qarsylasym jekpe-jekti ary qaraı jalǵastyrýdan bas tartty. Jekpe-jek Amerıkada bolǵandyqtan, qarsylasym ońaılyqpen beriledi dep oılamadym. Allaǵa shúkir, Qazaq eline áli talaı jeńister syılaımyn dep oılaımyn», – deıdi Balaýsa. 

Aıta keteıik, jastar arasyndaǵy álem chempıony Balaýsa Muzdıman jaqynda kásipqoı boksqa aýysqanyn habarlaǵan bolatyn, bul otandasymyzdyń kásipqoı bokstaǵy alǵashqy jekpe-jegindegi jeńisi.