Microsoft búkil álem boıynsha bulttyq jáne jergilikti sheshimderge jasalatyn kıbershabýyldar jóninde málimetterdi alyp, olardy taldap, qaýip-qaterlerdi, osal tustaryn zerttep, eń sońǵy kórsetkishtermen qamtylǵan esepterdi klıentterine usynady. 2017 jyldyń birinshi toqsanyndaǵy eseptiń jańa tomynda 100-den asa el men aımaqtaǵy eń mańyzdy degen kıbershabýyldar jóninde málimetter keltirilgen. Security Intelligence-tiń 22-tomynda asa mańyzdy ózgerister jaıly aqparat qamtylǵan, atap aıtqanda, bulttyq servıster jáne aqyrǵy núkteler jónindegi derekter jınaǵy retke keltirilip, alty aıdyń ornyna úsh aı ishindegi aqparat kórsetilgen.
«Qaýip-qaterlerdiń túrleri únemi ózgerip otyratyndyqtan, qaýipsizdik júıelerindegi úderisterdi muqıat zerttep, búkil álemdegi kompanıalarǵa jasalýy múmkin kıbershabýyldar jóninde aqparatty usyný biz úshin asa mańyzdy. Osynyń arqasynda shabýyldarǵa jaýap berip, aram nıetti hakerlerdiń áreketterine tosqaýyl qoıyp, korporatıvtik málimetterdi berik qorǵaı alamyz», - dep atap ótti Windows, Microsoft CIS baǵytynyń jetekshisi Ulan Qarajigitov.
Kompanıalar bultqa kóshken saıyn tirkeýlik jazbalarǵa jasalatyn shabýyldardyń jıiligi artyp, kúrdelene túsýde. Microsoft-tyń shabýylǵa ushyraýy múmkin bulttyq akkaýntarynyń sany bir jyl ishinde (2016 jyldyń 1-toqsany – 2017 jyldyń ekinshi toqsany) 300%-ǵa artty. Zararly IP-adresterden kirýge talpyný kórsetkishi 44%-ǵa ulǵaıǵan (2017 jyldyń 1-toqsanyndaǵy málimetter boıynsha).
2017 jyldyń birinshi toqsanynda Azure servısterine jasalǵan shabýyldardyń úshten ekisinen kóbi Qytaı jáne AQSH-taǵy IP-adresterden kelip tústi (sáıkesinshe 35,1% jáne 32,5%). Úshinshi orynda Koreıa tursa, odan keıin taǵy 116 el men aımaq ornalasty. Zıankester qoldanýshynyń urlanǵan derekterin qoldaný arqyly onyń bulttaǵy tirkeýlik jazbasyna kirýi múmkin. Osy tusta shabýyldardyń kópshiligi berik qupıasózdi ornatpaý ján de ony burys qoldanýdyń saldarynan oryn alatynyn atap ótken jón.
Eń keń taralǵan kıberqaýipterdiń birine zararly baǵdarlamalyq jabdyqtama kodyn jasyryn túrde júkteıtin saıttar jatady. Ondaı saıttarǵa ótken kezde braýzeri osal qorǵalǵan kompúterlerge vırýs juǵýy múmkin. Sondaı-aq, kompúterdegi mańyzdy faıldardy buǵattap, belgili bir aqshany tólemeıinshe ony jaýyp tastaıtyn bopsalaýshy baǵdarlamalar da asa qaýipti bolyp tabylady. Bospalaýshy baǵdarlamalar iri kompanıaladyń jumysyna nuqsan keltirip, búkil álemdegi myńdaǵan kompúterlerdi toqtatyp tastaıdy. Kóbinese mundaı baǵdarlamalar eýropalyq elderge birshama áser etýde: zararly kodpen juǵýdyń eń joǵarǵy deńgeıi Chehıa, Italıa, Vengrıa, Ispanıa, Rýmynıa jáne Horvatıada baıqalyp otyr. Windows 10 júıesinde bospalaýshylardyń shabýyldaryn aldyn alýǵa múmkindik beretin quraldar qarastyrylǵan. Sondaı-aq, Microsoft EDGE braýzeri Windows Qorǵaýshysymen biriktirilgendikten, zararly siltemelerdiń 98%-yn buǵattaı alady. Kúzdegi Fall Creators Update jańartylymynan keıin Windows 10 júıesinde bulttyq tehnologıalar negizinde kompúterlerdi qorǵaýǵa arnalǵan fýnksıalar qoljetimdi bolmaq.
Kompúterlerdiń osal tusyn anyqtap, ony paıdalanyp ketetin zararly baǵdarlamalar jınaǵy sońǵy ýaqytta jıilep ketti. Ondaı baǵdarlamalardy eksploıttar dep ataıdy. Veb-serverde ornatylǵan soń, eksploıttar paketi qaýipsizdik júıesi jańartylmaǵan kez kelgen korporatıvtik kompúterge qosyla alady.
Degenmen, derbes kompúterdiń osal jaqtaryn kúsheıtip, shabýyldardy barynsha azaıtýǵa bolady. Microsoft bul úshin kúrdeli qupıasózderdi qoldanýdy, qoldanýshynyń tulǵasyn tekseretin kópfaktorlyq tásilderdi (máselen, ymdy nemese PIN-kodty) qoldanýǵa keńes beredi. Korporatıvtik jelidegi qoldanýshylardyń qupıa derekterin, belgili bir qurylǵylar men operasıalyq júıelerdiń qoldanylýyn baqylap otyratyn qaýipsizdik saıasatyn májbúrli túrde qoldanysqa engizý qajet. Búkil jurtshylyq qoldana alatyn Wi-Fi jelileri arqyly jumys jasamaǵan jón, óıtkeni mundaı jeliler zıankesterdiń áńgimeńizdi syrttan tyńdap alyp, derekterińizdi jazyp alýǵa jáne jeke derekterińizge qol jetkizýine múmkindik beredi. Sondaı-aq, operasıalyq júıe men basqa da baǵdarlamalardy turaqty túrde jańartyp otyrý da kıbershabýyldardy aldyn alýǵa kómektesedi.
