Álem chempıony Gennadıı Golovkın jer silkinisinen zardap shekken meksıkalyqtarǵa 50 myń dollar kóleminde kómek aqshany aýdardy.  

Endi, sol jaqqa ózi baryp qaıtýdy josparlap otyr. Búkilálemdik boks keńesi (WBC) osy múmkindikti paıdalanyp, GGG-di óz sharalaryna qatystyrmaqshy, dep xabarlaıdy Qamshy.kz aqparat agenttigi QazAqparatqa silteme jasap.

"Golovkınniń úlgi alarlyq qasıetteri kóp. Ol otbasyna adal, jaqyn adamǵa ylǵı shyn júrekten kómektesýge tyrysady. Sol úshin xalyq ony jaqsy kóredi, syılaıdy. Basqa sportshylar problemaǵa urynsa, GGG janjaldan alys júredi. Álemge tanymal bolýy da sodan shyǵar. Biz óz chempıonymyzdy maqtan tutamyz. Golovkın - Meksıkadaǵy WBC elshisi", - deıdi Búkilálemdik boks keńesiniń prezıdenti Maýrısıo Sýleıman.

Aıta keteıik, WBC belbeýiniń ıegeri - Gennadıı Golovkın. Dál osy belbeýdi meksıkalyq Saýl Alvares qazaqstandyq boksshyǵa jekpe-jeksiz berdi. Sol kezde Búkilálemdik boks keńesi "Kanelony" Golovkınge qarsy shyǵýǵa mindettep, kelisimge kelýge naqty merzim belgilegen edi. Alaıda Alvares burynǵy promoýtermen sottasyp jatqanyn syltaýratyp, WBC belbeýinen óz erkimen bas tartty. Sol úshin meksıkalyq jankúıerlerdiń qaharyna ushyrady. Barlyǵy birdeı onyń Golovkınnen qashyp júrgenin betine basty. Suraq qoıdy, post jazdy. Tipti, óz týyna GGG-diń atyn maqtap jazǵan meksıkalyqtar da shyǵa bastady.

Osydan keıin Saýl Alvares Búkilálemdik boks keńesi men óz jerlesi - Maýrısıo Sýleımanǵa renjip, WBC ataǵy úshin múldem talaspaıtynyn málimdedi. Artynan Sýleıman myrza qansha jalynsa da, "Kanelo" alǵan betinen qaıtqan joq. Golovkınge qarsy sońǵy jekpe-jekte de WBC belbeýi úshin talaspady.