Ótken senbide qyrǵyz prezıdenti Almazbek Atambaev Ala-Archa rezıdensıasynda el azamattaryna Qyrǵyzstannyń damýyna qosqan úlesi úshin marapattaý rásimindegi sózin arandatýshylyq, jaýlyq rıtorıkada Qazaqstan prezıdentine jala jabýǵa arnaǵany belgili.

Sol kúni, kóp uzamaı Atambaevtyń osy sózine baılanysty Qazaqstan syrtqy ister mınıstrligi arnaıy málimdeme jasady. «Qazaqstan Qyrǵyz Respýblıkasynyń prezıdenti A. Atambaevtyń Qazaqstan Respýblıkasynyń basshylyǵyna qatysty sózderine baılanysty qatań narazylyq bildiredi jáne mundaı sózderge eki dostas memleketter arasyndaǵy qatynastarda jol berilmeýi tıis dep sanaıdy. Qyrǵyzstan prezıdentiniń saılaý aldy maqsatyndaǵy jaýapsyz, arandatýshylyq mándi jáne jalǵan pikiri elderimiz arasyndaǵy dostyq pen ózara kómektiń kópǵasyrlyq baılanystaryna nuqsan keltire almaıtynyna senim bildiremiz. Qazaqstan tarapy qyrǵyz halqymen dástúrli baýyrlastyq qatynastaryn damytý jolynda berik bolyp qala beredi» delingen málimdemede.

Syrtqy ister mınıstrligi notasynan keıin alǵash bolyp Qazaqstannyń halyqaralyq qatynastar jónindegi keńestiń tóraǵasy, saıasattanýshy Erlan Karın Almazbek Atambaevtyń sózderine baılanysty mynandaı málimdeme jasady: «Qyrǵyz prezıdenti ákimshiligi qazaqstandyq faktordy saıası tehnologıalyq qural retinde paıdalanýdy, al patrıottyq kóńil-kúıdi jasandy qozdyrý arqyly bılikke úmitkerdiń aınalasyna elektorattardy jumyldyrý jáne shoǵyrlandyrýdy oılastyrǵanǵa uqsaıdy. Kópshilik jaǵdaıda memleketaralyq qarym-qatynastar saıası tehnologıanyń qurbanyna jıi ári jeńil aınalyp jatady. ...Bir qýantarlyq jaıt, Qyrǵyz qoǵamynda «essizdikke» jol berý, joǵarydan berilgen tapsyrmany múltiksiz oryndaý faktorlary baıqalmaıdy. Eń bastysy qarapaıym halyq bul saılaý qıturqylary ekendigin jaqsy túsinedi. Sondyqtan da biz saılaý tezirek ótip, eki baýyrlas eldiń saıasaty tek naqty problemalar men kún tártibindegi ózekti máselelermen aınalyssa eken dep úmittenemiz».

Al dúısenbi kúni Qazaqstan premer-mınıstri B. Saǵyntaev Qyrǵyz prezıdenti A. Atambaevtyń aıtqan sózderine qatysty málimdeme jasady. «Aǵymdaǵy jyldyń 7 qazanynda Qyrǵyz Respýblıkasynyń Prezıdenti A. Atambaev Qazaqstannyń áleýmettik-ekonomıkalyq damýynyń jekelegen aspektilerine qatysty orynsyz ári eki eldiń ózara dostyq qarym-qatynasyna nuqsan keltiretin birqatar málimdeme jasady. Qyrǵyz Respýblıkasymen ekijaqty qarym-qatynasty damytýdyń buljymas baǵytyn rastaı otyryp, Qyrǵyzstan Prezıdentiniń saılaýaldy maqsatta jasalǵan jaýapsyz, arandatýshylyq mándi jáne kópe-kórineý jalǵan paıymy bizdiń elderimizdiń arasyndaǵy ǵasyrlar boıy qalyptasqan ózara kómek pen dostyqtyń dánekerine nuqsan keltirmeýi tıis. Osyǵan baılanysty men qyrǵyz jurtshylyǵyn Qazaqstannyń shynaıy ekonomıkalyq damýy týraly dereý habardar etýdi jón dep sheshtim», dedi Baqytjan Saǵyntaev. Sol kúni eldiń Basty arnasy – «Qazaqstan» telearnasynyń «Basty taqyryp» saraptamalyq baǵdarlamasynda Atambaevtyń málimdemesine taldaý jasap, Atamabaevty arandatýshy dep atady.

Dúısenbi Baqytjan Saǵyntaev Atambaevtyń esh negizsiz, sıfrlardy burmalaýǵa negizdelgen orynsyz sózderine baılanysty málimdeme jasaǵanyn atap ótti. QR Premer-Mınıstri senimdi faktilermen bekitilgen Úkimettiń resmı pozısıasyn jetkizgenin basa aıtty. Sonymen qatar seısenbi kúni eldiń resmı gazeti «Egemen Qazaqstanda» jáne orys tildi «Kazpravdada», Atamabaevtyń málimdemesine qarsy maqalalar jarıalandy. Osyndaı mazmundaǵy maqala «Egemeniń» keshegi nómirinde de jarıalandy.

Nurtaı Nurǵalı