Qazaqstan Prezıdenti Nursultan Nazarbaev Aqordada birqatar shetel Elshisinen  senim gramotasyn qabyldady.  Atap aıtqanda,  Shved Koróldiginiń Elshisi Mats Foıer, Kýba Respýblıkasynyń Elshisi Emılıo Pevıda Pýpo, Úndistan Respýblıkasynyń Elshisi Prabhat Kýmar, Ulybrıtanıa jáne Soltústik Irlandıa eliniń Elshisi Maıkl Djon Gıfford QR Prezıdentine senim gramotasyn tabystady, dep habarlaıdy Qamshy.kz aqparat agenttigi.

«Búgin sizderdiń Qazaqstandaǵy dıplomatıalyq mısıalaryńyz resmı túrde bastalady. Osy aıtýly kúnge oraı barshańyzdy jańa qyzmetterińizben quttyqtaımyn. Jaýapty ári mártebeli mısıalaryńyzda elderimizdiń arasyndaǵy yntymaqtastyqty jan-jaqty damytýǵa serpin tıgizedi dep senemin», - dedi Elbasy.

Memleket basshysy óz sózinde dıplomattardyń jumystary qyzyqty jáne jaýapty kezeńge tuspa-tus kelip otyrǵandyǵyn basa aıtty.

«Búginde álem jahandyq ózgerister qarsańyna tústi.  Jańa tehnologıalar álem elderi ekonomıkasynyń básekege qabilettiligin,  adamnyń ómir saltyn ózgertedi. Sondyqtan Qazaqstan halqyna «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýymdy jarıaladym. Men ekonomıkany, áleýmettik salany, sondaı-aq memlekettik basqarý isin damytýdyń negizgi baǵyttary boıynsha naqty 10  mindet qoıdym. Bul mindetterdi sheshý zamanaýı  tehnologıalardy paıdalanýdy kózdeıdi. Jańa sıfrlyq dáýirge tabysty beıimdelý, ozyq damyǵan 30  eldiń qataryna qosylý máselesine kómektesedi. Sol úshin bizde «Sıfrly Qazaqstan» memlekettik baǵdarlamasy qabyldanyp, iske asyrylyp jatyr. Ol ekonomıka men tirshiliktiń barlyq salasyn qamtıdy», - dedi Nursultan Nazarbaev.