Sársenbide Parklend qalasyndaǵy orta mekteptegi atystyń saldarynan 17 adam kóz jumdy.
Bı-bı-sı bolǵan oqıǵa jóninde, qandy qyrǵynnyń kýágeri, atalmysh mekteptiń oqýshysy Devıd Hoggpen sóılesti.
Devıd Hogg eń alǵash oqtyń atylǵan daýsyn 14:30-da estidi.
Ol ekologıa sabaǵynda otyrǵan. Muǵalim oqýshylarǵa test suraqtaryn taratyp bergen.
Qatty tarsyldaǵan dybys shyqqanda balalar bir-birine qarap qaldy. Bireý dybystyń atylǵan oqqa uqsaıtynyn aıtty.
Muǵalim esikti jaýyp qoıdy. Birneshe sekýndtan keıin sıgnalızasıa oınady.
- Biz dalaǵa shyqtyq. Bul jattyǵý jumystary dep oıladyq. Dálizge shyqqanda bizge qarama-qarsy bir top oqýshy júgirip kele jatty. Burylyp toppen birge qashtyq. Biz dál qylmyskerge qaraı bara jatqanymyzdy bilmedik. Aldymyzdan eden jýýshy aǵaı shyǵyp, «Ol jerge barmańdar, qylmysker sonda!» dep aıqaılady, - deıdi Devıd.
Bir top adam burylyp as pisirýdi úıretetin Eshlı Kýrttyń synybyna tyǵyldy.
- 30 sekýndtiń ishinde synypqa 30-40 adam jınaldy. Bólmedegi jaryq sóndirýli boldy. Oqýshylardyń biri shyńǵyryp, jylaı bastady. Oǵan sý berdik. Biraq kóbi sabyrlyq saqtady. Biraz ýaqyttan keıin telefonymyzdan atys týraly jańalyqtar shyǵa bastady.
Devıdtiń qaryndasy onymen bir mektepte oqıtyn.
- Men onyń tiri ekenin bildim. Ol maǵan eń aldymen jazdy, odan keıin qońyraý shaldy.
Devıd ákesine qońyraý shaldy. Basqa da oqýshylar ata-anasyna habarlasyp, olardy jaqsy kóretinin aıtty. Eshkim jylamady.
Devıd – bolashaq jýrnalıs. Ol synypta otyrǵandardan suhbat alǵan.
- Eger ólip qalsaq bizdiń daýsymyz máńgi estelik bolyp qalady dep oılamdym, - deıdi Devıd.
Bir saǵattan keıin synypqa bes áskerı adam kirip keldi de, jerge jatyp, qol kóterýge buıryq berdi. Biraz ýaqyttan keıin qolymyzdy kótergen kúıde syrtqy shyǵardy.
Devıd qaýipsiz jerge bolǵanda eseńgirep qalǵanyn aıtady. Ol ákesi men qaryndasyn kórdi. Qaryndasynyń qurbysy oqqa ushyp, kóz jumǵan eken.
- Mundaıdyń qaıtalanǵanyn qalamaımyn. 17 úıde bir adamnyń orny bosap qaldy. Bireýdiń balasy ajal qushty. Mundaı qatigezdikti buryn-sońdy kórmedim, - deıdi Devıd.
