Elbasy el erteńine eleńdep, mınıstrlerdi jeke qabyldap jatyr. Olardy prezıdent kabınetine kirerde, sıqyrshy ataı «sýf!» dep kishkentaı bir–eki jasar bala etip jiberedi. Shyǵarda «Ýf!»dep túkirip, qazirgi mınıstr qalpyna keltire qoıady eken. 
Elbasy kabınetine «Jaǵympaz» mınıstri kirdi, kishkentaı balaqaı bolyp. Biraq ózine shaq kóstim–shalbar kıgen, moınynda galstýgy bar degendeı...
–Balaqaı mınıstr, qazaqsha sóıleı alasyń ba?
–Shóleımin.
–Halyq deshi?
–Ǵalyq.
–Ha–lyq?
–Ǵa–lyq.
–Biz Qazaqstanda turamyz. Memlekettik til–qazaq tili. Úkimet te, parlament te qazaqsha sóıleýi kerek. Sola ma balaqaı?
–Sholaı, óte duıysh aıtasyz, meniń oıym da sholaı...
–Má, qazaqsha tiliń shyǵyp kele jatyr eken, kámpıt jeı ǵoı! –degen Elbasy ıilip, basyn shulǵı bergen balaqaı mınıstrge shokolad berdi. Kelesi «Qazaq kreslosy» mınıstri kabınetke kire salyp, «bıp–bıp, bým–bým, voooom!» dep kishkentaı mashınasymen oınaı bastap edi, Elbasy ony kóterip aldy.
–Atyń kim seniń?
–Bastyq.
–Famılıań?
–Jastyq.
–Qazaqsha tiliń jaqsy shyǵypty ǵoı, nege qazaqpen qazaqsha sóılespeısiń?
–Kóz tıip ketedi me dep... Keshirińiz, túkirip qoıyńyzshy?
Prezıdent mınıstrge túkirip, tańdaıyn kóterip qoıdy. Taǵy bir balaqaı mınıstr keldi. 
–Seniń tiliń aǵylshynsha shyqqan deıdi. Haliń qalaı?
–Okeı.
–Úkimette baıandamańdy qazaqsha jasa, jaraı ma?
–Okeı...
–Atyń kim?
–Okeı.
–Okeı emes, tiliń kelmeı tur ǵoı, Álkeı, Álkeısiń sen. Samsa jeısiń be?
–Okeı.
Prezıdent samsany usyna berip, qolyn tartyp qaldy.
–Joq, sen aldymen qazaqsha sóıleýdi úırenip kel, sosyn jeısiń samsany...
–Ó–óó, katynym kashtyyy.. –dep jylady mınıstr.
–Qatynym qashqany nesi? –dep surady prezıdent.
–Samsa beıińizshi, katynym kashtyyy...
–A, qarnym ashty deısiń be, balaqaı? Bar, qazaqsha úırenip kele ǵoı! Saǵan sınhrondy aýdarma kerek emes, quqyń taptalatyndaı. Qazaqtyń qara domalaq balasy ekensiń...
Mınıstr balaqaı kabınetten jylap shyqty, «Burynǵy qalpyma keltirińizshi?» dep sıqyrshydan surap shyqty. Qudaıym–aı, Elbasy aıtpaı júr eken de, keıbir mınıstrler men depýtattar, senatorlar qazaqsha úırený úshin qazaq bala–baqshalaryna baryp júrdi. Jasa, Qazaq tili! Ýra, Úkimettiń tili shyqty!