Armenıa prezıdenti Armen Sarkısán TMD memleketteriniń elshilerimen eldegi jaǵdaıdy talqylady. Bul týraly Armenıa prezıdentiniń baspasóz qyzmeti habarlady.

«Prezıdent Armen Sarkısán Belarýs, Qazaqstan, Túrkmenstan Respýblıkalarynyń tótenshe jáne ókiletti elshilerin qabyldady. Kezdesý barysynda kún tártibindegi mańyzdy oqıǵalar men eki jaqty seriktestik máseleleri talqylandy», - delingen baspasóz habarlamasynda.

RIA Novostı Armenıadaǵy sherýlerdiń basynda turǵan opozısıa basshysy Nıkol Pashınánnyń Reseı, EO, Iran jáne Grýzıa elshilerimen kezdesýge nıetti ekenin habarlaǵan.

«Biz Reseı, EO, Iran, Grýzıa, sonymen qatar dıplomatıalyq korpýs ókilderimen kezdesýdi josparlap otyrmyz. Olarmen eldegi saıası ahýaldy talqylaımyz», - dep keltirdi Pashınánnyń sózin Sputnik Armenıa portaly.

Eske sala keteıik, Armenıada opozısıa lıderi Nıkol Pashınán Úkimet basshysy bolyp saılana almady. Premer-mınıstrlikke jalǵyz úmitker bolǵan opozısıa lıderine Armenıa Respýblıkalyq partıasynyń depýtattary qarsy daýys bergendikten tıisti daýysty jınaı almady.

13 sáýirde Armenıadaǵy jappaı sherý aksıasyn basqarǵan Pashınán – premerlikke jalǵyz úmitker. Ony opozısıalyq «Elk» fraksıasy usyndy. Demonstranttar 23 sáýirde eldiń burynǵy premer-mınıstri Serj Sargsándy laýazymynan bosatyp, onyń ornyna Pashınándy úkimet basy etýdi talap etken.

«Elk»-tiń úmitkerin «Sarýkán» jáne «Dashnaksýtún» atty eki fraksıa da qoldady. Bul úsh fraksıanyń depýtattarymen qosa Armenıa Respýblıkalyq partıasynyń taǵy 6 depýtaty Pashınánǵa daýys berýi kerek edi. Partıa basshysy Vagram Bagdasarán buǵan deıin «úsh fraksıa Pashınándy qoldasa, Respýblıkalyq partıa bóget keltirmeıdi» dep málimdegen.