Polısıa jumysyndaǵy kemshilikti İİM Krımınaldyq polısıa departamentiniń basshysy Armanbek Baımurzın bastaǵan qyzmetkerler toby anyqtaǵan.

Denıs Tenniń qazasynan soń Almaty ishki ister departamentiniń 13 qyzmetkeri jazalandy dep habarlaıdy Qamshy.kz aqparat agenttigi baribar-ǵa silteme jasaı otyryp.

QR İİM málimetinshe, salanyń shuǵyl qyzmetti tekserý men shuǵyl aldyn alý sharalary keshenin júrgizý úshin 19 shildede İİM Ortalyq apparatynyń, sonyń ishinde ózindik qaýipsizdik qyzmetiniń İİM Krımınaldyq polısıa departamentiniń basshysy Armanbek Baımurzın bastaǵan qyzmetkerler toby Almatyǵa keldi.

Sonymen birge İshki ister mınıstriniń orynbasary Rashıd Jaqypov Almatyda mánerlep syrǵanaýshynyń ólimine qatysty istiń jan-jaqty, tolyq ári obektıv zerttelýin qadaǵalady.

“Tekserý men praktıkalyq kómek kórsetý barysynda İİD-nen qoǵamdyq qaýipsizdikti qamtamasyz etý, qoǵamdyq oryndarda jáne aýla ishindegi aýmaqtarda qylmystyq quqyqbuzýshylyqtardyń aldyn alý jáne ýchaskelik polısıa ınspektorlarynyń jumysyn uıymdastyrý máseleleri boıynsha kemshilikter men zańsyzdyqtar anyqtaldy. Qyzmettik tekserý nátıjesi boıynsha İİD-niń 13 qyzmetkeri, sonyń ishinde úsh jetekshi qatań tártiptik jaýapkershilikke tartyldy”, – delingen QR İshki ister mınıstriniń birinshi orynbasary Janat Súleımenovtiń Almaty qoǵamdyq keńesiniń úndeýine qaıtarǵan jaýabynda.

Qalanyń jergilikti polısıa qyzmetiniń basshysy Jasulan Baıkenov pen Almaly aýdandyq jergilikti polısıa qyzmetiniń basshysy Serik Qumabekov te osy sebepten jumystan qýylǵan.

Buǵan qosa, Almaty İİD-de 27 shildede İshki ister mınıstriniń orynbasary Rashıd Jaqypovtyń tóraǵalyǵymen shuǵyl keńes ótken, onda tekserýler men tergeýdi uıymdastyrý nátıjeleri qaralyp, departament qyzmetteriniń aldyna ashylmaǵan múlik urlyǵy qylmystaryn sapaly ári tolyq tekserý, urlanǵan zattar satylatyn oryndarda izdeý sharalaryn júrgizý jáne buryn sottalǵan adam retinde esepte turǵan adamdardy tekserý jóninde naqty maqsat-mindetter qoıyldy.