AQSH-tyń Ýoshıto okrýgindegi Arkanzas shtatynda polısıa qyzmetkerlerin qaıran qaldyrǵan oqıǵa boldy. 5-ke de tolmaǵan eki bala jol apatynan keıin qaıtys bolǵan analarynyń janynda 4 kún boıy tiri jatqan. Bul týraly jergilikti ABC15 Arizona agenttigi habarlady.

«Bul 11 jyl boıǵy jumys tájirıbemdegi eń erekshe jaǵdaı. Bir jaǵynan qaıǵyly, biraq ǵajap oqıǵa», - dep óz áserimen bólisken eken okrýg detektıvi Neıtan Grılı.

Jýrnalıserge oqıǵanyń mán-jaıyn balalardyń atasy baıandap bergen. Jol apatynan keıin úsh jasar Kaılen Holıman avtokóliktiń joǵarǵy bóligindegi ashyq turǵan terezeden shyǵady. Al kólik joldan ushyp ormanǵa qaraı aýdarylǵan.

«Nemerem syrtqa shyǵyp, óli jatqan anasyn kórgen. Janyna baryp oıatpaq boldy», - dedi balanyń atasy.

Qaıtys bolyp ketken anasynyń janynda tórt kún boıy jatqan balaqaı besinshi kúni ormannan adam izdeýge shyǵady. Ony jol boıyndaǵy quqyq qorǵaýshylar baıqap qalyp, kólikti taýyp alady. Kóliktiń ishinde qorǵanys beldigine oralǵan Kaılenniń bir jastaǵy baýyry otyr eken. Ekeýi de tiri, búginde aýrýhanada jatyr, dárigerler balalardyń aman qalatynyn aıtty.

Al qaıtys bolǵan analary úshinshi balaǵa ekiqabat bolǵan.