1 qańtardyń tańerteńinde Magnıtogorskte qulaǵan úıdiń astynan 11 aılyq sábı tiri tabyldy dep habarlaıdy Qamshy.kz aqparat agenttigi currenttime.tv saıtynyń deregin negizge alyp. Vaná Fokın esimdi sábı jarylys bolǵan kezde balalarǵa arnalǵan kereýette uıyqtap jatqan.

«Sábıdiń anasy da din aman. Ol aýrýhanaǵa kelip sábıiniń tiri ekenine kóz jetkizdi. Vaná 325 páterdiń turǵyny», dep aqparatty rastady organ qyzmetkerleri.

Resmı aqparatqa súıensek, sábıdiń jaǵdaıy óte aýyr. Dárigerler balany Máskeýdegi balalar aýrýhanasyna aparyp emdeýge daıyn. 11 aılyq balanyń bas-súıegi zaqymdalǵan.

Al Chelábınsk oblysynyń gýbernatory Borıs Dýbrovskııdiń aıtýy boıynsha, qutqarýshylar turǵyn úıdi tekserip, qoqystan tazalap júrgen kezde balanyń jylaǵan daýsyn estigen. Sheneýnik bala kereýette jyly oranǵan kúıinde uıyqtap jatqandyqtan  aman qalǵanyn aıtty.

Balanyń ákesi jarylys kezinde jumysta bolǵan. Al anasy men aǵasy jarylystan keıin alǵashqylardyń biri bolyp qutqaryldy. Ákesi bolsa, qutqarýshylardyń kıimin kıip, balasyn izdeý úshin qutqarý jumystaryna aralasqan.

«Men arnaıy kıim alyp, birden qutqarý jumystaryna aralastym. Qutqarýshylarǵa balamnyń qaıda jatqanyn joramaldap kórsettim. Sol jerden balamdy taýyp aldyq. Bul biz úshin jańa jyldyq ǵajaıyp syı boldy», — deıdi 11 aılyq sábıdiń ákesi Evgenıı Fokın. 

Aıta ketsek, 31 jeltoqsanda Magnıtogorsk qalasyndaǵy on qabatty úıde gaz jarylyp, bir podezd qıraǵan. Mınıstrliktiń esebine sáıkes, 48 páter endi turýǵa jaramsyz. Bul podezde 46 adam turǵan. Úısiz qalǵandar qaladaǵy mektepterdiń sport zaldaryn panalap jatyr.

Reseı prezıdenti Vladımır Pýtın apat bolǵan kúni Magnıtogorsk qalasyna shuǵyl jetip, oqıǵaǵa baılanysty tótenshe jaǵdaı mamandarymen jıyn ótkizdi. Sondaı-aq, ol gaz jarylǵan úıge, qalalyq aýrýhanaǵa baryp, naýqastardyń hal-jaǵdaıymen tanysty.