Bıyl Qazaqstanda halyq sanaǵy júredi. 2019 jyldyń eń basty oqıǵasy osy halyq sanaǵy ekeni belgili. Buǵan memleket te basa mán berip otyr. Halyq sanaǵyna qazynadan 8,8 mıllıard teńge jumsalmaq. Bir ereksheligi, bıylǵy sanaq elektrondy formatta ótpek. Statısıka komıtetiniń málimetine qaraǵanda, azamattar 89 suraqqa jaýap beredi. Onyń ishinde 45 saýal azamattardyń jeke málimetteri men josparyna qatysty. Alǵashqy sanaq mamyr-maýsym aıynda, ekinshisi qarasha aıynda ótpek. Sonymen qatar, halyq sanaǵyna 30 myń erikti tartylatyn bolady. Olar úı-úıdi aralap, kez kelgen adamǵa qatysty málimetti jınaıdy, ony planshetke túsiredi.

Elimizde qazirgi tańda  18 mıllıon 393 myńnan astam halyq turady. Mamyr aıyna deıin bul derek taǵy da tolyǵa túsedi. Al bizdiń aıtpaǵymyz bul emes. Bul sanaqtyń mańyzy zor. Óıtkeni...

1. Bul on jyldan keıin júrgizilip otyrǵan halyq sanaǵy.
2. Ulttyń demografıalyq úlesin kórsetetin basty kórsetkish.
3. Bıylǵy halyq sanaǵynyń saıası - áleýmettik, tarıhı máni bar.

Sondyqtan...

Bul sanaqta memleketqurýshy ulttyń basymdyǵy aıqyn kórsetilýi tıis. Óıtkeni osydan on jyl burynǵy sanaqta respýblıka halqynyń úles salmaǵynda qazaqtyń sany alǵashqyda 65 paıyz dep kórsetildi de, bul derek keıinnen  63 paıyz delinip ketti. Munyń jalǵan nemese shynaıylyǵyn eshkim ańǵara almaı qaldy. Kópshiligi buǵan mán bergenimen, keıin umytylyp ketti. Sondyqtan osy joly atalǵan kemshilikter qaıtalanbaýy tıis. Óıtkeni...

Qazaqtyń sany barǵan saıyn artyp barady.  Muny aldaǵy ýaqytta ashyq kórsetýimiz tıis. Óıtkeni biz kópultty memleketpiz be? Aldaǵy sanaqtan keıin mundaı termındi qoldanýdy múldem qoıý kerek. Barǵan saıyn elimizde azaıyp bara jatqan basqa dıasporalardyń sany da naqty kórsetilýi kerek. Onda da negizgi dıasporalardyń deregi shynaıy bolýy tıis. Orystar qansha qaldy, nemister men ózbekter jáne káristerdiń sany qansha? Munyń barlyǵy qajet jáne  kerek derek dep bilemiz. Óıtkeni osyǵan baılanysty qazaqqa qatysty bıliktiń ustanǵan saıasaty da kúrt ózgerýi tıis.  Bıylǵy halyq sanaǵy bizdiń basty kórsetkishimiz bolatyny anyq. Demek, qazaqtyń demografıalyq úlesine qarap, bıliktiń de ózgeretin kezi keldi. Halyq sanaǵyna qatysty bizdiń aıtpaǵymyz osy edi...