Qazaqstan Respýblıkasynyń Shahmat federasıasy osydan eki jyl buryn Reseıge aýysqan shynashaqtaı qyzymyz Bıbisara Asaýbaevanyń elge oralatynyn habarlady. Iá, Bıbisara kórshi eldiń namysyn qorǵaý úshin Máskeý oblysyna aýysty, Hımkı qalasynan oǵan eki bólmeli páter berildi, degen habardy estigende ony jatqa qımaı, ishimiz ashyp, kádimgideı qapa bolyp edik. Mine, Allanyń buıryǵymen qyzymyz óz Otanyna oralýdy uıǵarypty. Bıbisaranyń jasy 14-te. Áıelder arasyndaǵy álemdik reıtıńte 89-orynda tur. Osy jerde 2019 jyldyń aqpan aıyndaǵy jer shary boıynsha tańdaýly TOP-100-diń ishindegi eń jasy bizdiń Bıbisara ekenin basa aıtqymyz kelip otyr. Sebebi, shahmat kúres pen bokstaǵydaı salmaq dárejesine jiktelmeıdi. Myqtynyń bári bir alamannyń ishinde sheberligin synaıdy. Mysaly, dúnıe júzi boıynsha 100 myń shahmatshy TOP-100-ge enýge áreket jasasa, bizdiń bala sonyń alǵashqy júzdigine enip otyr.
Qazaqstan Shahmat federasıasy FIDE-ge Bıbisara Asaýbaevany Qazaq eliniń federasıasyna qosý jaıynda resmı hat joldapty. Buıyrtsa, jaqyn arada Halyqaralyq shahmat federasıasynan súıinshi habar kelýge tıis.
Tarazda týǵan Bıbisara tórt jasynan shahmatqa qumartqan eken. 2008 jyly 24 jastaǵy reseılik Aleksandra Kostenúk áıelder arasynda álem chempıonynyń aq jáne sary altynmen aptalǵan, brıllıantpen bezendirilgen tájin kıedi. Sony kórgen kishkentaı Bıbisara osyndaı chempıondyq tájdi meniń de kıgim keledi, dep atasynan shahmat oınaýdy úırenip alady. Sol armannyń jeteginde sharshy taqtaǵa baılanǵan balǵyn qyz 2011 jyly áýeli 7 jasqa deıingi qyzdar arasynda álem chempıonaty atansa, araǵa birneshe aı salyp jeti jasynda 8 jasqa deıingi qyzdardyń álemdik birinshiliginde taǵy da bas júldeni jeńip aldy. Bıbisara 2017 jyly Mınskide ótken erler arasyndaǵy Eýropa chempıonatynda baǵyn synap, FIDE-niń erler sport sheberi dárejesine qol jetkizdi. 13 jasar qyzdyń bul tabysyn shahmat mamandary joǵary baǵalady.
Bıbisara balǵyndyǵyna qaramaı Shyńǵys han, Gıtler, Stalın, taǵy basqa tarıhı tulǵalar týraly kitaptardy oqyǵan eken. Shahmat álemindegi chempıondar jaıynda da habary mol. Bizdiń sportshynyń eń ańsarly armany – áıelder arasynda álem chempıony bolý! «Nıno Chıbýrdanıdze 16 jasynda álem chempıony atandy, meniń áli ýaqytym bar», - deıdi shahmatshy qyz. Eń bastysy, ata jurtyńa oraldyń, buıyrǵany bola jatar, Bıbisara!
Qydyrbek Rysbek
