Búginde álemge mártebeli memleket retinde tanylǵan qazaq eliniń tarıhy tereń, mádenıeti máýeli, dástúri qalyptasqan el ekeni óskeleń urpaqtyń sanasyna sińirip, jadynda jattatý – barshamyz úshin úlken jaýapkershilik.  Elbasy óziniń «Uly dalanyń jeti qyry» atty tarıhı eńbeginde osy uly baǵyttardy aıqyndap berdi.

Keshe Astanada tanystyrylymy ótken «Altyn taq» fılmin tamashalaǵannan keıin bárimizdiń boıymyzda erekshe rýhanı serpilis paıda boldy. Buǵan deıin Qazaq handyǵynyń 550 jyldyǵyna oraılastyrylyp túsirilgen «Almas qylysh» fılminiń zańdy jalǵasy bolyp tabylatyn bul týyndyny kórgennen keıin shyn máninde dúnıege qazaq bop týǵanyńdy maqtanysh etedi ekensiń. Mádenıet jáne sport Mınıstri Arystanbek Muhamedıulynyń tikeleı jetekshiligimen sońǵy 4 jyl kóleminde túsirilgen bul fılmdi álemdik kıno ónerine qosylǵan biregeı shyǵarma dep baǵalaýǵa bolady. Qazaq handyǵynyń irgesin qalaǵan uly handar Kereı men Jánibektiń sońynan ergen Alash ulysyn shashyratyp jibermeı, ulttyń birligin saqtap, syrtqy jaýǵa qaımyqpaı qarsy turyp, búgingideı ulan-baıtaq dalamyzdy qorǵap, qazirgi urpaqqa amanat etip qaldyrǵany fılm jelisinde barynsha sheberlikpen ashyp kórsetiledi. Fılmdegi akterlerdiń óte  joǵary deńgeıdegi oıynyn, 15-ǵasyrdaǵy qazaq halqynyń turmys-saltyn kóz aldyńa keltiretin dekorasıany, tarıhı shytyrman oqıǵalarmen órilgen sújetti – týyndynyń básie bıiktetken jetistikteriniń qataryna engizýge bolady. Ásirese, qazaqtyń baıyrǵy astanasy Syǵanaq qalasyn shaıbanıdterden qaıta alyp, memlekettiliktiń sımvoly altyn taqty qaıtarýy  bizdiń Máńgilik el bolýdaǵy asqaq muratymyzǵa jetý jolyndaǵy tarıhı kúresterdiń aıshyqty kórinisi deýge bolady.

Fılm kórsetiliminen keıin jurtshylyq aldyna shyqqan rejıser Rústem Ábdirashev, senarı avtory, belgili jazýshy Smaǵul Elýbaev, Májilis depýtaty, qoǵam qaıratkeri Bekbolat Tileýhan bul kınotýyndy «tar jol taıǵaq keship» búginde eńsesi bıik elge aınalǵan qazaq ultynyń rýhanı shejiresi ekenin atap ótip,  osy jobany ázirleýge bastama jasaǵan Elbasyna jáne túsirilimin tikeleı úılestirgen Mádenıet jáne sport mınıstrligine alǵystaryn aıtty. «Altyn taq» fılmi ulttyq rýhymyzdyń taǵy bir jemisi men jetistigi dep aýyz toltyryp aıta alamyz.

Berik Ábdiǵalıuly