«Altyn kórse, perishte joldan taıady» degen maqal bul prezıdentti aınalyp ótken sekildi. Ol prezıdentten buryn bıznesmen, mıllıoner ári tabysty sportshy. Biraq «joldan taıǵan joq». Munyń dáleli nede deseńizder, asyp-tasqan baılyǵy bola tura, anasy eski úıde turady. Jo-joq, anasyn qurmettemegeni, jaqsy kórmegeni emes, kúıeýi ekeýi kirpishin óz qoldarymen qalaǵan qara shańyraqta qalýdy qart ana ózi sheshken eken. Al prezıdent anasyna jıi baryp turady, jaı ǵana baryp qoımaıdy. Ústindegi kostúm-shalbaryn sheship, qarapaıym fýtbolka kıip barady, úı tirlikterin óz qolymen atqarady. Anasy daıyndaǵan taǵamdy jep, qolynan qoıý shaı ishedi. Ústinen kostúm-shalbaryn ǵana emes, «prezıdent» degen laýazymyn túgel sheshedi. Jalpy ananyń qarapaıym balasyna aınalady.

Mońǵol eliniń basshysy bir suhbatynda: «Anama eshqashan resmı kıimmen barmaımyn, onyń kózinshe qaltamnan kóp aqsha shyǵarǵan da emespin. Bul kisi úkimetten alatyn az zeınetaqysyn únemdep, kelesi aıǵa deıin jetkizýge úırengen adam», - degen eken.

Mońǵolıa prezıdenttiniń anasy turatyn kóshe

Mońǵolıa prezıdenti Haltmaagıın Battýlganyń ájesi S.Doljınsúren Han-Ýýl aýdanyndaǵy Iaarmag kóshesinde turady. Iaarmag Týýl ózeniniń ońtústik jaǵasynda ornalasqan mońǵol astanasyndaǵy eń kóne dańǵyldardyń biri.

Mine, Mońǵolıa prezıdenti Battýlga osy kóshede týyp ósken.

Búginde Doljınsúren ájeıdiń jasy 90-da, bir qyzy men eki uldy tárbıelep ósirgen ana. Uldarynyń biri – búginde el basqaryp otyrǵan Haltmaagıın Battýlga. İnisi – sportshy. Al ájeıdiń 3 balasynan 21 nemeresi bar eken.

2018 jyly Doljınsúren gýaı (gýaı – mońǵoldardyń úlken kisige degen qurmetin kórsetetin kıeli sózi) «Jar» («Sýprýga») atty tele baǵdarlamaǵa tústi. Onda mońǵol prezıdentiniń týyp ósken úıi kórsetildi.

Ári ájeı óziniń marqum kúıeýi men balalarynyń balalyq shaǵy jaıly aıtyp berdi. Baǵdarlama sońynda Dljınsúren gýaı men onyń balalary, arasynda Battýlga da bar, dámdi taǵamdar ázirledi.

Mońǵol tilindegi baǵdarlamanyń YouTube arnasyndaǵy nusqasy tómende...

Mońǵol prezıdenti jaıly 10 fakt

1 Mońǵol prezıdenti – shyǵarmashylyq adamy, sýretshi. Jergilikti sýretshiler asosıasıasynyń múshesi.

2 Jas shaǵynda dzúdo ári sambomen aınalysty, Mońǵolıa quramasynyń múshesi boldy. Álem Battýlgany alǵash sportshy retinde tanydy. 1989 jyly sambodan álem chempıony atandy. Sportshynyń jeńisin Otany da baǵalady – bılik oǵan tórt bólmeli páter syılady.

3 1990 jyly ol bızneske taban tiredi. Ózin tabysty kásipker retinde kórsete bildi. Sıngapýrdan vıdeokameralar ákelip, olardy eki ese qymbat baǵamen sata aldy. Al búgine Battýla Mońǵolıanyń eń baı adamdarynyń qatarynda. Onyń baılyǵy 1,2 mıllıard dollarǵa baǵalandy.

4 Ári memleket basshysy Ulan-Batyrǵa jaqyn mańǵa bıiktigi 40 metr bolatyn Shyńǵys hannyń atty eskertkishin saldyrdy. Ol eldegi eń úlken, eń iri eskertkishtiń biri sanaldy.

5 Bıznes pen saıasatta mol tabysqa jetkenimen, Battýlga sporttan alystamady. Aptasyna úsh márte birneshe saǵat ýaqyt sportzalda ótkizedi.

6 Saıasatqa 2004 jyly aralasty. Mońǵol parlamentiniń depýtaty atandy. Ýaqyt óte kele transport mınıstri, odan keıin aýyl sharýashylyǵy jáne ónerkásip mınıstri laýazymdaryn ıelendi.

7 Mınıstr bolǵan ýaqytynda jemqorlyqpen aıyptaldy.

8 Sheteldik BAQ-tar Battýlgany saıasatkerden góri batyrǵa kóbirek uqsatty.

9 Battýlga shlápa kıgendi jaqsy kóredi, rok stılindegi ánderdi tyńdaıdy.

10 Bir suhbatynda ákesiniń kózinshe alkogóldi sýsyndardy ishpeıtinin aıtqan, al shyn mánisinde, ol ákesi men baýyry sekildi múlde ishpegen, ishpeıdi de.