Jaqyn arada Reseıde sońǵy qazaq mektebi jabyldy degen aqparat taraǵan bolatyn. Soǵan baılanysty saıasattanýshy Dos Kóshim Reseıdegi qazaq mektebiniń jabylýyn qos qoldap qoldaıtynyn aıtty, dep jazady Qamshy.kz aqparat agenttigi.

"Men Reseıdegi sońǵy qazaq mektebiniń jabylǵanyn qos qolymdy kóterip qoldaımyn.

Sebebi, ol orys memleketiniń óz ıdeologıasy bar. Ondaǵy turǵyndar da orys tilin bilý kerek. Sondyqtan, qazaq mektebi jabylady. Jáne JOO-larda da basqa tilden sabaq berilmeıdi. Bul Germanıada da bar, Fransıada bar, barlyq memleketterde bar nárse. Sondyqtan, oǵan bola ashýlanýdyń qajeti joq.

Bizdiń renjıtinimiz, ózimiz sondaı qadamǵa bara almaı otyrmyz. Bizde eshqandaı avtonomıa joq. Mysaly, Reseıde tatarlarǵa, bashqurttarǵa basqalarǵa ózderiniń tilderi bolý kerek deıdi. Bizde ondaı joq qoı. Bizde barlyǵy Memlekettik tilde bolý kerek. Sondyqtan biz de barlyq mektepti qazaq tiline kóshirýge tıispiz.

Til negizinen otbasynda saqtalady. Bizdegi sheshenderdi, ıngýshtardy qarasańyz birimen-biri tek qana óz tilderinde sóılesedi. Kúrtter, túrikter de solaı. Olar orys mektebinde oqıdy, keıbiri qazaq mektebinde oqıdy. Biraq, ózara tek qana ana tilderinde sóılesedi. Bul otbasyndaǵy qaǵıda. Sondyqtan ol jaqtaǵy aǵaıyn balasyna kishkentaıynan qazaq ekenin qulaǵyna quıyp ósirse, tilin, mádenıetin saqtap qalýǵa bolady. Bul jerde mektepke baılanyp qalǵan eshteńe joq.

Iá, olar da sol memlekettiń azamaty esebinde jaqsy qyzmet atqarǵysy keledi, básekeles bolǵysy keledi. Ol úshin orys mektepterinde oqyǵandary durys. Eger, bolashaqtaryn sol elmen baılanystyryp, sonda qalýǵa nıettengender bolsa. Al, "men qazaqtyń azamatymyn, qazaq memleketinde turamyn" dep kelgender bolsa, árdaıym esigimiz ashyq. Eger, kelmeıtin bolsa, ózderiniń tańdaýy, qajet bolsa sol jerde júrip-aq qazaq mádenıetin saqtap qalar. Ol - orystyń ortasy. Ony moıyndaýymyz kerek. Qytaıdaǵy, Ózbekstandaǵy, basqa jaqtaǵy qazaqtar da osyny oılaný kerek.

Sondyqtan bul jerde “esiń barda eliń tap” dep bir-aq nárse aıtýǵa bolady.

Usynǵan: Nazerke Labıhan