Kópbalaly otbasylarǵa baspanany 2-3 paıyzdyq nesıemen berý sharalary mamyrda bastalady. Bul týraly Parlament májilisiniń jalpy otyrysynda belgili boldy, dep habarlaıdy Qamshy.kz aqparat agenttigi QazAqparattyń deregin negizge alyp.
«Elbasy kópbalaly otbasylardy qoldaý sharalaryn kúsheıtý úshin Turǵyn úı qurylys jınaqtary júıesi arqyly jyldyq 2-3 paıyzben turǵyn úı qaryzyn berýdiń jeńildetilgen tetigin ázirleýdi de tapsyrdy. Osyǵan baılanysty jyldyq eki paıyzben baspana qaryzyn alý úshin qandaı sharttar kózdelgen? Sonymen kópbalaly otasylar úshin jeńildikti turǵyn úı qaryzyn berý qashan bastalady?», - dep surady depýtat Baqytbek Smaǵul.
Óz kezeginde «Qazaqstannyń turǵyn úı qurylys jınaq banki» AQ basqarma tóraǵasynyń orynbasary Janar Jubanıazova qazirgi ýaqytty bul máseleniń qarjylyq negizdemesi jasalǵanyn atap ótti.
«Qazirgi tańda ol ekonomıkalyq saraptamadan ótip jatyr. Sodan keıin qaıtadan memlekettik-jekeshelik áriptestik ortalyǵyna engizemiz. Ulttyq ekonomıka mınıstrligi maquldaǵannan keıin, barlyq tıisti qujattardy rásimdeımiz», - dedi ol.
J. Jubanıazovanyń aıtýynsha, ákimdikter tizimde turǵandar aıasynda kópbalaly analardyń jáne de múgedek balalary bar otbasylardyń eki paıyzdyq nesıege baspana alý múmkindigi boıynsha Turǵyn úı qurylys jınaq bankine joldama beredi
«Sol joldama boıynsha osy otbasylar bizdiń bankten nesıe alý múmkindigine ıe bolady. Bizdiń oıymyzsha, mamyr aıynyń aıaǵyna taman nesıe berýdi bastaımyz», - dedi ol.
Aıta keteıik, QR Tuńǵysh Prezıdenti - Elbasy Nursultan Nazarbaev áleýmettik jaǵynan az qamtylǵan azamattarǵa 2 prosenttik ıpoteka berý máselesin qarystyrýdy tapsyrǵan bolatyn. Atalǵan nesıe naqty úsh kategorıaǵa berilýi kerek. Olar - kópbalaly otbasylar, tolyq emes otbasylar jáne múgedek balalary bar otbasylar.
Usynǵan: Ásel Bolatqyzy
