Aıtys aqyndary men jyrshy-termeshilerdiń halyqaralyq odaǵy "Nur Otan" partıasynyń kandıdaty Qasym-Jomart Toqaevty qoldaıdy. Bul týraly 24 sáýirde Almatyda ótken odaq quryltaıynda aıtyldy dep jazady Qamshy.kz aqparat agenttigi Azattyqtyń deregin negizge ala otyryp. 

Odaq tóraǵasy Júrsin Erman prezıdent saılaýyna túspeıtinin málimdedi. Buǵan deıin qazaqstandyq keıbir aqparat quraldary men áleýmettik jelide "Júrsin Erman saılaýǵa kandıdatýrasyn usynbaq" degen aqparat taraǵan.

Quryltaıda Júrsin Erman "áýelde prezıdent saılaýyna túsýdi oılaǵanyn aıtady. Biraq Nur-Sultan jaqtan bir adamdar "saılaýǵa qatyssań, aıtystyń jolyn jaýyp alýyń múmkin dep eskertken". Osydan keıin ol "saılaýǵa qatysý oıynan aınyǵan".

Júrsin Erman prezıdent saılaýyna túsip, halyqtyń, bıliktiń nazaryn qazaqtyń aıtys jáne jyr-terme ónerine aýdarǵysy kelgen. Ermannyń aıtýynsha, quryltaıǵa deıin ol Almaty ákimi, "Nur Otan" partıasynyń Almaty qalalyq fılıalynyń jetekshisi Baýyrjan Baıbekpen kezdesken.

"Ákim aıtysty siz saılaýǵa túspeseńiz de qoldaımyz dep ýáde berdi" deıdi Júrsin Erman.

Qazaqstannyń qazirgi prezıdenti Qasym-Jomart Toqaevty 23 sáýirde "Nur Otan" partıasy prezıdent saılaýyna kandıdat retinde usynǵan.

Sondaı-aq "Uly dala qyrandary" respýblıkalyq qozǵalysy Sádibek Túgeldi, Qazaqstan Respýblıkasy kásipodaqtar federasıasynan (QRKF) Amangeldi Taspıhovti, "Aqjol" partıasy májilis depýtaty Danıa Espaevany prezıdent saılaýyna kandıdat retinde usynǵan.

Qazaqstanda kezekten tys prezıdent saılaýy 9 maýsymda ótedi. Kandıdattardy usyný 28 sáýirde, al tirkeý 11 mamyrda aıaqtalady.

Usynǵan: Ásel Bolatqyzy