Avstrıanyń Braýnaý qalasy meriniń orynbasary jáne avstrıalyq Erkindik partıasynyń múshesi Krıstıan Shılher mıgranttardy egeýquıryqqa teńegen óleńi úshin synǵa ushyrap, jumystan ketti dep habarlaıdy Qamshy.kz aqparat agenttigi bbc.com saıtyna silteme jasaı otyryp.
Shılherge partıadan jáne qala meriniń orynbasary qyzmetinen ketýge týra keldi.
Avstrıanyń federaldy kansleri Sebastán Kýrstiń aıtýynsha, Shılherdiń otstavkaǵa ketýi – atalǵan jaǵdaıǵa baılanysty eń durys sheshim boldy. Buǵan deıin kansler óńirlik sheneýniktiń óleńderin adamgershilikke jatpaıtyn jáne násildik kemsitýge jol berilgen unamsyz shyǵarma dep ataǵan bolatyn. Tipti mundaı adamǵa Avstrıada turýǵa oryn joq ekenin atap ótken.
«Qalalyq egeýquıryq» dep atalǵan aty shýly óleńinde saıasatker mıgranttarǵa tez arada «kózderin qurtýdy» nemese kelgen ortaǵa beıimdelýge keńes bergen.
Bul óleń Adolf Gıtler týyp ósken Avstrıanyń Braýnaý qalasynyń «Erkindik» partıasynyń partıalyq gazetinde jaryq kórgen.
Avstrıanyń vıse-kansleri jáne Avstrıa Erkindik partıasynyń belsendisi Haıns-Krıstıan Shtrahe de óleńge teris pikirin bildirgen.
Sonymen qatar bul óleńderden tarıhı sıpatqa ıe uqsastyqtardy anyqtap otyr. Avstrıanyń Sosıal-demokratıalyq partıasynyń basshysy Pamela Rendı-Vagner, mundaı teńeýler buǵan deıin nasıstik nasıhattaýlarda jıi qoldanysqa ıe bolǵanyn atap ótti.
Sońǵy ýaqytta Avstrıada násildik kemsitýlerge jol berilgen daý-damaılar jıilep ketken.
Sondaı-aq, ótken aptada Shtrahe óziniń feısbýk paraqshasynda Holokostty joqqa shyǵaratyn saıtqa silteme jasaǵan bolatyn. Jastardyń «Dástúrler kóshi-qondy jeńedi» degen urany nasıstik antısemıttik beınelerdi qoldanǵany úshin synǵa alyndy.
Shılherdiń óleńinde mynadaı joldar bar:
«Bizben birge ómir súrip jatqan egeýquıryqtar bizdiń erejelerimizben ómir súrýi kerek» jáne «Biz sıaqty ómir súrińder, ne bolmasa kózderińdi qurtyńdar», - degen joldar keltirilgen.
Keıin Shılher óziniń jazǵan sózderi arqyly eshkimdi kemsitkisi kelmegenin aıtty. Onyń jeke pikiri boıynsha, saıasatker tarıhı astarǵa mán bermegen tek eldegi ózgeristerdi atap ótkisi kelgen. Aıtýynsha, bul jaǵdaıdy barlyǵy ózinshe «ádiletti synaýǵa» kóshken.
Aýdarǵan Marjan Sábet
