UOS ardegeri Ibat Jumaev 1917 jyldyń 18 sáýirinde burynǵy Jympıty aýdany, Saroı selosynda dúnıege kelgen.  Eńbek jolyn Qazaqstan aýyl keńesinde bastaýysh synyp muǵalimi bolyp bastaǵan ol soǵysqa deıin túrli qyzmetterdi atqarady, dep Almaty.tv málimdedi.

1942 jyldyń 25 shildesinde Qyzyl Ásker qataryna alynǵan. Uıymdastyrýshylyq qabiletimen birden kózge túsken ol soǵysqan jerlerinde bólimshe komandıri, ýchastok komendanty, vzvod komandıriniń orynbasary bolǵan.  

Voronej frontynda 237-atqyshtar dıvızıasy, 524-pýlemet batalóny bólimi, 2-pýlemet rotasy kómekshisi bolǵan ol aǵa leıtenant Malkovtyń usynysymen «Qyzyl Juldyz» ordenine usynylyp, 1943 jyly marapattalǵan.  

Malkovtyń keltirgen sıpattamasy boıynsha 1943 jyldyń 5 aqpanynda Ibat Jumaev kómekshilik etetin rotaǵa Kýrsk oblysynyń Joǵary Kleshenka aýylynan Marıno selosyna shyǵý jáne osy joldaǵy qarsylastarǵa soqqy berý tapsyrylady. Urysty bastaǵan sátte qasyndaǵy birinshi nómirli jaýynger jaralanyp, joldas Jumaev tez arada pýlemetty qolyna alyp, qarsylastarǵa oq atqan sátinde birden 15 nemistiń kózin joıady. Jáne fashıserdiń alǵa jyljýyna múmkindik bermeıdi. Osy soǵystyń ekinshi kúninde  Sennoe aýylynda vzvod qatarynan alǵa birinshi bop shyǵyp, bes nemisti jer jastandyrady. Al aqpannyń toǵyzynshy kúni Efrasımovka selosyn alý barysynda ardager Jumaev qarsylastarynyń otty bóshkeleriniń kózin joıyp,  sol jerde on nemisti ajal aýylyna attandyrǵan (www.podvignaroda.ru saıtynan alynǵan málimet).

Ibat Jumaev soǵysta tórt jylyn ótkizip, kelgennen keıin sovhozdyń jumystaryna aralasady. Aýyl sharýashylyǵy salasynda jetistikti eńbek etip, joǵary nátıjeler kórsetkeni úshin alǵys hattarmen marapattalady, «Eńbek Eri» atanady. Alaıda ózi kelgennen keıin urpaqtaryna soǵys týraly kóp ashylyp aıta bermegen, sóıtip ardagerdiń kóptegen erligi jumbaq kúıinde qalypty.