T. Ábildaev: naýqastardyń 75%-da COVID-19 bastapqy kezeńde anyqtalyp, aýrý jeńil túrde ótken. Bul týraly Almaty qalasy Qoǵamdyq densaýlyq basqarmasynyń basshysy Tileýhan Ábildaev habarlady.

Búgingi kúni Almatyda adamdardyń keńeıtilgen kontıngentin erte PTR ádisimen dıagnostıkalaý boıynsha jumystar qarqyndy júrgizilýde. Bul medısına qyzmetkerleri, qala aýmaǵyndaǵy ár túrli áskerı bólimderdiń áskerı qyzmetkerleri, karantınge qoıylatyn talaptardyń saqtalýyn baqylaý maqsatyndaǵy patrúldik quram, İİM júıesiniń qyzmetkerleri, blok-beketterge jumysqa tartylǵan tulǵalar. 

– Qazir COVID-19 vırýsy buryn juqtyrǵan naýqastarmen qarym-qatynasta bolǵan adamdardan anyqtalyp jatyr. Iaǵnı, bul azamattardyń barlyǵy ınfeksıanyń odan ári taralmaýy maqsatynda karantındik gospıtáldarda 14 kúndik oqshaýlaýda bolǵan. Bul sharalar Almatyda aýrýdy erte satysynda indetti juqtyrǵandardyń sanyn anyqtaýǵa múmkindik berdi. Sonyń arqasynda, COVID-19-ben aýyratyn naýqastardyń 75%-da aýrý jeńil túrde jáne tek 2%-da ilespe aýrýlardyń bolýy saldarynan aýyr jaǵdaıda ótýde. Qalǵandarynyń jaı-kúıi ortasha deńgeıde. Qazirgi tańda Almaty qalasynda ÓJJ apparatyna qosylǵan, aýyr jaǵdaıdaǵy naýqastar joq. Shaharda ólim-jitim kórsetkishi 0,58%-dy quraıdy. Basqa elderde bul kórsetkish 2-5% aralyǵynda, – dedi Tileýhan Ábildaev.

Basqarma basshysynyń aıtýynsha, barlyq medısınalyq qyzmetkerler jeke qorǵanys quraldarymen qamtamasyz etilgen jáne olardy paıdalaný boıynsha únemi oqý-jattyǵý jumystary júrgiziledi.

Aıta ketý kerek, jańa modýldik juqpaly aýrýlar aýrýhanasynda búginde 255 naýqas bar. Modýldik keshenniń palatalary ishinde keri qysym týdyratyn jeldetý júıesi jumys isteıdi, ıaǵnı sol arqyly vırýsqa toly aýa tolqyny palata aýmaǵynan shyqpaı, arnaıy zalalsyzdandyrý júıelerine enedi.

Palatalarda germetıkalyq (aýa ótkizbeıtin) esikter ornatylǵan, káriz júıesin tazalaýdyń erekshe júıesi jumys isteıdi. Almatyda 10 mamyr kúni saǵat 17.00-de koronavırýstyq ınfeksıany juqtyrýdyń rastalǵan 1578 jaǵdaıy tirkeldi. Qazirgi ýaqytta ınfeksıalyq stasıonarlarda 1178 adam koronavırýsty ınfeksıadan emdelýde. Qaýipti indetten 391 adam jazylyp shyqty.